Home ଜିଲ୍ଲା ପରିକ୍ରମା ଧାମରା ରେଳପଥ ଯୋଗୁଁ ଦୁର୍ଦ୍ଦଶାରେ ସାଧାରଣ ଜନତା, କାର୍ଯ୍ୟ ବନ୍ଦ ରଖିବାକୁ ଚାଷୀ ମୂଲିଆ ସଂଘର...

ଧାମରା ରେଳପଥ ଯୋଗୁଁ ଦୁର୍ଦ୍ଦଶାରେ ସାଧାରଣ ଜନତା, କାର୍ଯ୍ୟ ବନ୍ଦ ରଖିବାକୁ ଚାଷୀ ମୂଲିଆ ସଂଘର ଚେତାବନୀ

49

ଭଦ୍ରକ, ୨୨ା୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକରୁ ଧାମରା ଯାଇଥିବା ରେଳପଥ ପାଇଁ ସ୍ଥାନୀୟ ଲୋକଙ୍କ ଦୁର୍ଦ୍ଦଶା ବଢିଛି । ସେମାନଙ୍କ ସମସ୍ୟା ପ୍ରତି ଆଖି ବୁଜିଦେଇଛନ୍ତି କର୍ତ୍ତୃପକ୍ଷ । ତେଣୁ ଏହି ରେଳପଥ ପାଇଁ ଯେଉଁ ସମସ୍ୟା ଦେଖାଦେଇଛି, ସେଗୁଡିକର ସମାଧାନ ପାଇଁ ଚାଷୀ ମୂଲିଆ ସଂଘ ପକ୍ଷରୁ ଚେତାବନୀ ଦିଆଯାଇଛି । ଯଦି ଏ ଦିଗରେ ୭ ଦିନ ମଧ୍ୟରେ କର୍ତ୍ତୃପକ୍ଷ ସମାଧାନର ସୂତ୍ର ବାହାର ନକରନ୍ତି, ସ୍ଥାନୀୟ ଲୋକେ ନୂତନ ଭାବେ ଚାଲିଥିବା ନିର୍ମାଣ କାର୍ଯ୍ୟ ବନ୍ଦ କରିବେ ବୋଲି ସଂଘ ପକ୍ଷରୁ ଭଦ୍ରକ ଜିଲାପାଳ, ଏସ୍‌ପି, ଧାମରା ବନ୍ଦର କର୍ତ୍ତୃପକ୍ଷ, ସ୍ୱତନ୍ତ୍ର ଭୂ-ଅର୍ଜନ ଅଧିକାରୀଙ୍କୁ ଅବଗତ କରାଯାଇଛି । ସଂଘର ଜିଲା ସଂପାଦକ ସୁଶାନ୍ତ ଜେନାଙ୍କ କହିବା ଅନୁଯାୟୀ ଏହି ରେଳପଥ ପାଇଁ ସ୍ଥାନୀୟ କେଦାରପୁର ପଞ୍ଚାୟତର ସେରପୁର ଗ୍ରାମବାସୀ ଆବଶ୍ୟକ ସାହାଯ୍ୟ ସହଯୋଗ ଯୋଗାଇ ଦେଇଥିଲେ । ନିଜ ମୂଲ୍ୟବାନ ଜମି ମଧ୍ୟ ପ୍ରଶାସନ ଦ୍ୱାରା ବିନା କୌଣସି ପ୍ରତିବନ୍ଧକରେ ଅଧିଗୃହିତ ହୋଇଥିଲା । ଇଚ୍ଛାପୁର-ବାସୁଦେବପୁର ନିକଟରେ ଥିବା ଲେଭେଲ କ୍ରସିଂ ଦେଇ ପ୍ରତ୍ୟହ ଶହ ଶହ ଚାଷୀ, ଛାତ୍ରଛାତ୍ରୀ, ଗ୍ରାମବାସୀ ଯିବାଆସିବା କରିଥାନ୍ତି । ମାତ୍ର ଏଠାରେ ଗୋଟିଏ ଓଭର ବ୍ରିଜ୍ ନିର୍ମାଣ ହେଉନାହିଁ ।

ସଂପୃକ୍ତ ଅଂଚଳ ଅନ୍ଧକାର ରହୁଛି । ଚାଷ ଜମିରୁ ଜଳ ନିଷ୍କାସନ ପାଇଁ କୌଣସି ବ୍ୟବସ୍ଥା ନାହିଁ । ଫଳରେ ଚାଷ ପ୍ରତିବର୍ଷ ନଷ୍ଟ ହେଉଛି । ଏକ ଅସ୍ଥାୟୀ ନାଳରେ ଜଳ ନିଷ୍କାସନ ହେବା ଦ୍ୱାରା ନିକଟବର୍ତ୍ତୀ ଗ୍ରାମ ଜଳମଗ୍ନ ହେଉଛି । ସେହିପରି କେଦାରପୁର ପଞ୍ଚାୟତର ୧୪ ନଂ ୱାର୍ଡ ଓ ଗାଜିପୁର ଗ୍ରାମ ରେଳ ଲାଇନ୍ ପାଶ୍ୱର୍ରେ ଅବସ୍ଥିତ । କିନ୍ତୁ ରେଳପଥ ପାଶ୍ୱର୍ ଦେଇ ଯାଇଥିବା କଚ୍ଚା ରାସ୍ତାର ଅବସ୍ଥା ଶୋଚନୀୟ ହୋଇପଡିଲାଣି । ଜରୁରୀ କାଳୀନ ସ୍ଥିତିରେ ଆମ୍ବୁଲାନ୍ସ ଓ ଅଗ୍ନିଶମ ବାହିନୀ ଗାଡି ମଧ୍ୟ ଗାଁ ମଧ୍ୟକୁ ଆସି ପାରୁନାହିଁ । ଅନୁରୂପ କଂପାନୀ ପକ୍ଷରୁ ନିଯୁକ୍ତି ଦିଆନଯିବାରୁ ସ୍ଥାନୀୟ ଅଂଚଳର ବହୁ ଯୁବକମାନେ ଚୋରା କୋଇଲା କାରବାରରେ ଲିପ୍ତ ରହୁଛନ୍ତି । ପୂର୍ବରୁ ଗୋଟିଏ ରେଳ ଧାରଣା ଥିବାବେଳେ ଏବେ ଏହାର ଦୋହରୀକରଣ କାର୍ଯ୍ୟ ଚାଲିଛି । ହେଲେ ମୂଳ ସମସ୍ୟା ଗୁଡିକ ପ୍ରତି ଧ୍ୟାନ ଦିଆଯାଉନାହିଁ । ତେଣୁ ନୂତନ ନିର୍ମାଣ ସମୟରେ ଆବଶ୍ୟକତା ଅନୁଯାୟୀ ଓଭରବ୍ରିଜ୍‌, ସ୍ଥାୟୀ ପକ୍କା ଡ୍ରେନ୍‌, ସ୍ଲୁଇସ୍ ଫାଟକ, କଲଭର୍ଟ ନିର୍ମାଣ କିରବାକୁ ସଂଘ ଦାବି କରିଛି । ଏହାବ୍ୟତୀତ ଗ୍ରାମବାସୀଙ୍କ ପାଇଁ ଉଦ୍ଦିଷ୍ଟ ରାସ୍ତାର ଉନ୍ନତିକରଣ, ଲେଭେଲ କ୍ରସିଂ ନିକଟରେ ଆଲୋକ ବ୍ୟବସ୍ଥା, ସ୍ଥାନୀୟ ଯୁବକଙ୍କ ନିଯୁକ୍ତି, ଟ୍ରେନ୍‌ରେ କୋଇଲା ଓରଭଲୋଡିଂ ବନ୍ଦ କରିବା ସହିତ ଚାଷୀଙ୍କ ହିତ ପ୍ରତି ଦୃଷ୍ଟି ଦେବାକୁ ସଂଘ ପକ୍ଷରୁ ଦାବି କରାଯାଇଛି । ଏକ ସପ୍ତାହ ମଧ୍ୟରେ ଏ ଦିଗରେ ପଦକ୍ଷେପ ନନେଲେ କାର୍ଯ୍ୟ ବନ୍ଦ କରିବାକୁ ସଂଘ ପକ୍ଷରୁ ଚେତାବନୀ ଦିଆଯାଇଛି ।

LEAVE A REPLY

Please enter your comment!
Please enter your name here

Solve this *Time limit exceeded. Please complete the captcha once again.