ଓଡ଼ିଶା

ପ୍ରବାସୀ ସାଂସଦ ସମ୍ମିଳନୀରେ ପ୍ରଧାନମନ୍ତ୍ରୀଙ୍କ ଉଦବୋଧନ

– ଭାରତୀୟଙ୍କ ଆଶା ଓ ଆକାଂକ୍ଷା ଏବେ ସର୍ବୋଚ୍ଚ ସ୍ତରରେ
– ପିଆଇଓମାନେ ଭାରତର ସ୍ଥାୟୀ ରାଷ୍ଟ୍ରଦୂତ
– ବିକାଶ ଲକ୍ଷ୍ୟ ହାସଲ ଦିଗରେ ପ୍ରବାସୀଙ୍କ ଭୂମିକା ଗୁରୁତ୍ୱପୂର୍ଣ୍ଣ

ନୂଆଦିଲ୍ଲୀ ୧୦-୧ (ଓଡ଼ିଆ ପୁଅ) ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀଠାରେ ଆୟୋଜିତ ପ୍ରବାସୀ ସାଂସଦ ସମ୍ମିଳନୀର ଉଦଘାଟନୀ ଅଧିବେଶନରେ ଉଦବୋଧନ ଦେଇଛନ୍ତି।

ସମ୍ମିଳନୀରେ ପ୍ରତିନିଧିମାନଙ୍କୁ ସ୍ୱାଗତ ଜଣାଇ ପ୍ରଧାନମନ୍ତ୍ରୀ କହିଥିଲେ ଯେ ଅଧିକାଂଶ ଲୋକ ଶହ ଶହ ବର୍ଷ ଧରି ଭାରତ ଛାଡ଼ିସାରିଛନ୍ତି, ତଥାପି ସେମାନେ ନିଜ ମନ ଏବଂ ହୃଦୟରେ ଭାରତକୁ ସ୍ଥାନ ଦେଇଛନ୍ତି। ସେ କହିଥିଲେ, ଏଥିରେ ଆଦୌ ଆଶ୍ଚର୍ଯ୍ୟର ହେବାର ନାହିଁ ଯେ ଭାରତୀୟ ବଂଶୋଦ୍ଭବ ଲୋକମାନେ ସେମାନେ ରହୁଥିବା ଦେଶକୁ ସମ୍ପୂର୍ଣ୍ଣ ଭାବେ ଆପଣେଇ ନେଇଛନ୍ତି। ସେ ଆହୁରି କହିଥିଲେ ଯେ ଭାରତୀୟତାକୁ ନିଜ ଭିତରେ ଉଜ୍ଜୀବିତ ରଖି ସେମାନେ ସେସବୁ ଦେଶର ଭାଷା, ଭୋଜନ, ଚାଲିଚଳଣୀ, ସଂସ୍କୃତି ଏବଂ ବେଶପୋଷାକକୁ ଗ୍ରହଣ କରିନେଇଛନ୍ତି।

ପ୍ରଧାନମନ୍ତ୍ରୀ କହିଥିଲେ ଯେ ଆଜି ଏପରି ଅନୁଭବ ହେଉଛି ଯେପରି ଦିଲ୍ଲୀରେ ଭାରତୀୟ ବଂଶୋଦ୍ଭବମାନଙ୍କୁ ନେଇ ଏକ କ୍ଷୁଦ୍ର ବିଶ୍ୱ ସଂସଦ ଏକତ୍ରିତ ହୋଇଛି। ଭାରତୀୟ ବଂଶୋଦ୍ଭବ ଲୋକମାନେ ଆଜି ମରିସସ, ପର୍ତୁଗାଲ ଏବଂ ଆୟାର୍ଲାଣ୍ଡର ପ୍ରଧାନମନ୍ତ୍ରୀ ହୋଇପାରିଛନ୍ତି। ସେ ଆହୁରି କହିଥିଲେ ଯେ ଭାରତୀୟ ବଂଶୋଦ୍ଭବ ଲୋକମାନେ ଏବେ ଅଧିକାଂଶ ଦେଶ ଏବଂ ସରକାରରେ ମୁଖ୍ୟ ହୋଇପାରିଛନ୍ତି।

ପ୍ରଧାନମନ୍ତ୍ରୀ କହିଥିଲେ ଯେ ଗତ ତିନିରୁ ଚାରି ବର୍ଷ ମଧ୍ୟରେ ଭାରତରେ ବ୍ୟାପକ ପରିବର୍ତ୍ତନ ଆସିଥିବା ନେଇ ବିଶ୍ୱସ୍ତରରେ ଏକ ଧାରଣା ସୃଷ୍ଟି ହୋଇଛି। ସେ କହିଥିଲେ, ଏହା ପଛରେ ଥିବା କାରଣଟି ହେଉଛି ଭାରତ ନିଜକୁ ରୂପାନ୍ତରିତ କରୁଛି। ଭାରତରେ ଏବେ ଆଶା ଓ ଆକାଂକ୍ଷା ସର୍ବୋଚ୍ଚ ସ୍ତରରେ ପହଁଚିଛି। ପ୍ରତ୍ୟେକ କ୍ଷେତ୍ରରେ ଯୁଗାନ୍ତକାରୀ ପରିବର୍ତ୍ତନର ସଂକେତ ଦେଖିବାକୁ ମିଳିଛି।

ପ୍ରଧାନମନ୍ତ୍ରୀ କହିଥିଲେ ଯେ ଯେଉଁଠି ଥା’ନ୍ତୁ ପଛେ ପିଆଇଓମାନେ ଭାରତର ସ୍ଥାୟୀ ରାଷ୍ଟ୍ରଦୂତ ଏବଂ ସେ ବିଦେଶ ଗସ୍ତ କରିଥିବା ସମୟରେ ସବୁବେଳେ ସେମାନଙ୍କୁ ଭେଟିବା ପାଇଁ ଚେଷ୍ଟା କରିଥା’ନ୍ତି।

ବିଦେଶରେ ଭାରତୀୟ ନାଗରିକମାନେ ସମ୍ମୁଖିନ ହେଉଥିବା ସମସ୍ୟା ପ୍ରତି ଲଗାତାର ଦୃଷ୍ଟି ରଖିଥିବାରୁ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ଏହି ପରିପ୍ରେକ୍ଷୀରେ ବାଣିଜ୍ୟିକ ଦୂତାବାସଜନିତ ଅଭିଯୋଗର ତ୍ୱରିତ ସମାଧାନ ଏବଂ ନିର୍ଦ୍ଧାରିତ ସମୟରେ ଅନୁଧ୍ୟାନ ପାଇଁ ସେ “ମଦଦ” ପୋର୍ଟାଲ ସମ୍ପର୍କରେ ଉଲ୍ଲେଖ କରିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ପ୍ରବାସୀ ଭାରତୀୟମାନେ ଭାରତର ବିକାଶରେ ଭାଗିଦାର ବୋଲି ସରକାର ବିଶ୍ୱାସ କରନ୍ତି। ସେ କହିଥିଲେ ଯେ ନୀତି ଆୟୋଗଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ଡ୍ରାଫ୍ଟରେ ୨୦୨୦ ସୁଦ୍ଧା ଧାର୍ଯ୍ୟ ଲକ୍ଷ୍ୟ ହାସଲରେ ପ୍ରବାସୀ ଭାରତୀୟଙ୍କ ସ୍ଥାନ ଗୁରୁତ୍ୱପୂର୍ଣ୍ଣ।

ପ୍ରଧାନମନ୍ତ୍ରୀ କହିଥିଲେ ଯେ ଅସ୍ଥିରତାର ଏହି ସମୟରେ ଭାରତୀୟ ସଭ୍ୟତା ଏବଂ ସାଂସ୍କୃତିକ ମୂଲ୍ୟବୋଧ ସାରା ବିଶ୍ୱର ମାର୍ଗଦର୍ଶନ କରିପାରିବ।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

Odia Pua is the first Odia News paper which is printed & Published from New Delhi & first Odia mobile news site.

© 2018 | Odiapua.com, All Rights Reserved. | Powered By Suryanandan.net

To Top