ଜିଲ୍ଲା ପରିକ୍ରମା

ସମ୍ଭାବ୍ୟ ବନ୍ୟା ପରିସ୍ଥିତ ପାଇଁ ପ୍ରାକୃତିକ ବିପର୍ଯ୍ୟୟ ମୁକାବିଲା ପ୍ରସ୍ତୁତି ବୈଠକ

ବୌଦ୍ଧ୨୭ା୦୫(ଓଡ଼ିଆ ପୁଅ ସଜ୍ଜନ କୁମାର ଅଗ୍ରୱାଲା) : ବୌଦ୍ଧଜିଲାରେ ପ୍ରାକୃତିକ ବିପର୍ଯ୍ୟୟ ସମୟରେ ସମ୍ଭାବ୍ୟ ପରିସ୍ଥିତିର ମୁକାବିଲା ପାଇଁ ଏକ ପ୍ରସ୍ତୁତି ବୈଠକ ଜିଲାପାଳ ମଧୁସୁଦନ ମିଶ୍ରଙ୍କ ଅଧ୍ୟକ୍ଷତାରେ ସର୍ବଶିକ୍ଷା ଅଭିଯାନର ସମ୍ମିଳନୀ କକ୍ଷଠାରେ ଅନୁଷ୍ଠିତ ହୋଇଯାଇଛି। ପ୍ରାକୃତିକ ବିପର୍ଯ୍ୟୟ ସମୟରେ ସୂଚନା ଆଦାନ ପ୍ରଦାନକୁ ବୈଠକରେ ପ୍ରାଥମିକତା ପ୍ରଦାନ କରାଯିବା ସହିତ ଆସନ୍ତା ଜୁନ ପହିଲା ଠାରୁ ପ୍ରତି ବ୍ଲକ ଓ ସଦରମହକୁମାରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯିବାକୁ ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି। ସେଥିପାଇଁ ଜିଲା ମୁଖ୍ୟାଳୟର କଣ୍ଟ୍ରୋଲ ରୁମ ୦୬୮୪୧-୨୨୨୦୨୩ ଓ ଟୋଲ ଫ୍ରି ନଂ ୧୦୭୭ ଜୁନ ପହିଲାରୁ କାର୍ଯ୍ୟକ୍ଷମ କରିବାକୁ ସୂଚନା ଦିଆଯାଇଥିଲା। ଜିଲାରେ ମହାନଦୀ ଓ ତେଲ ନଦୀ ଭଳି ଚିରସ୍ରୋତା ନଦୀ ୧୧୦ କିମି ପ୍ରବାହିତ ହେଉଥିବାବେଳେ ବର୍ଷା ସମୟରେ ଜିଲାର ଶାଖା ନଦୀ ଓ ପାହାଡର ପାଣି ଯୋଗୁଁ ବନ୍ୟା ବିଭୀଷିକା ସୃଷ୍ଟି କରିଥାଏ। ତେଣୁ ସମ୍ଭାବ୍ୟ ବନ୍ୟା ପରିସ୍ଥିତି ର ମୁକାବିଲା ପାଇଁ ଜିଲାପାଳ ବିଭିନ୍ନ ବିଭାଗ ପକ୍ଷରୁ ହୋଇଥିବା ପ୍ରସ୍ତୁତି ସଂପର୍କରେ ସମୀକ୍ଷା କରିବା ସହ ସମସ୍ତ ବିଭାଗକୁ ସତର୍କ ରହିବାକୁ ପରାମର୍ଶ ଦେଇଥିଲେ। ବିଶେଷ ଭାବରେ ନଦୀକୂଳ, ଆଡିବନ୍ଧ ଓ କେନାଲ ଗୁଡିକର ସୂରକ୍ଷା ଉପରେ ଆଲୋଚନା କରାଯିବା ସହିତ ବର୍ଷାର ପରିମାଣ ଓ ନଦୀପାଣିର ଗତି ରେକର୍ଡ କରାଯିବା ଉପରେ ଗୁରୁତ୍ୱ ପ୍ରଦାନ କରାଯାଇଥିଲା। ବନ୍ୟା ସମୟରେ ଯୋଗାଯୋଗକୁ ଗୁରୁତ୍ୱ ଦିଆଯିବା ସହିତ ସଠିକ୍ ରୋଡମେପ୍ ତିଆରିକରିବା, ବନ୍ୟାଞ୍ଚଳ ଗୁଡିକୁ ଚିହ୍ନଟ କରିବା, ପାଣିପାଗ ସଂପର୍କରେ ଆଗୁଆ ସୂଚନା ସଂଗ୍ରହ କରିବା, ବନ୍ୟା ଚିହ୍ନଟ ଗ୍ରାମ ନିକଟରେ ଉଦ୍ଧାର ଏବଂ ରିଲିଫ କାର୍ଯ୍ୟ ପାଇଁ ପାୱାର ବୋଟ୍ ଓ ଦେଶୀଡଙ୍ଗା ବ୍ୟବସ୍ଥା କରାଯିବା, ଯୋଗାଯୋଗ ପାଇଁ ପୋଲିସ ପକ୍ଷରୁ ଓୟାରଲେସ ସେବା ସୁବିଧା ଉପଲବ୍ଧ କରାଇବା, ବନ୍ୟା ଆଶ୍ରୟସ୍ଥଳୀ ଗୁଡିକରେ ଆଗୁଆ ଶୁଖିଲା ଖାଦ୍ୟ, ଚାଉଳ, ଡାଲି, କିରୋସିନୀ ଆଦି ମହଜୁଦ ରଖାଯିବା, ସ୍ୱାସ୍ଥ୍ୟ ବିଭାଗ ପକ୍ଷରୁ ମୋବାଇଲ ହେଲଥ ଟିମ୍ ସହିତ ସମସ୍ତ ଚିକିତ୍ସାଳୟରେ ଆବଶ୍ୟକୀୟ ଜରୁରୀ େଔଷଧ ମହଜୁଦ ରଖାଯିବା ଏବଂ ଗୃହପାଳିତ ପଶୁମାନଙ୍କ ପାଇଁ ଖାଦ୍ୟ ଓ େଔଷଧ ଆଦି ମହଜୁଦ ରଖିବାନେଇ ଆଲୋଚନା କରାଯାଇଥିଲା। ଡଙ୍ଗା ଗୁଡିକ ରେଜେଷ୍ଟ୍ରିଭୁକ୍ତ, ଇନସୁରାନସ ଓ ଲାଇଫଗାଡ ରଖିବାକୁ ପରାମର୍ଶ ଦିଆଯାଇଥିଲା। ପ୍ରାକୃତିକ ବିପର୍ଯ୍ୟୟ ସମୟରେ ଚାଷୀ କିପରି କ୍ଷତିପୂରଣ ପାଇପାରିବେ ଓ ଚାଷ କ୍ଷତି ନହେବ ସେଥି ପ୍ରତି ଦୃଷ୍ଟି ଦେବାକୁ ପରାମର୍ଶ ଦିଆଯାଇଥିଲା। ସହରର ଡ୍ରେନେଜ ବ୍ୟବସ୍ଥା ପ୍ରତି ପୌର କର୍ତ୍ତୃପକ୍ଷ ସ୍ୱତନ୍ତ୍ର ଦୃଷ୍ଟିଦେବାକୁ ଅନୁରୋଧ କରାଯାଇଥିଲା। ସେହିପରି ପ୍ରାକୃତିକ ବିପର୍ଯ୍ୟୟ ସମୟରେ ଯେକୌଣସି ପରିସ୍ଥିତିର ମୁକାବିଲା କରିବା ପାଇଁ ସବୁବେଳେ ପ୍ରସ୍ତୁତ ରହିବାକୁ ଅଗ୍ନିଶମ ବିଭାଗକୁ ନିର୍ଦ୍ଦେଶ ଦିଆଯାଇଥିଲା। ବନ୍ୟା ପରିସ୍ଥିତିର ମୁକାବିଲା ପାଇଁ ଜିଲାରେ ଦୁଇଗୋଟି ଓଡ୍ରାଫ ଟିମ୍କୁ ପ୍ରସ୍ତୁତ ରଖାଯିବାକୁ ନିଷ୍ପତି ଗ୍ରହଣ କରାଯାଇଥିଲା। ବୈଠକରେ ଅତିରିକ୍ତ ଜିଲାପାଳ ତରଣୀସେନ ନାଏକ, ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ରାଜେନ୍ଦ୍ର କୁମାର ପଟ୍ଟନାୟକ, ଉପଜିଲାପାଳ ଏନସି ଜ୍ୟୋତିରଂଜନ ନାଏକ, ଏନଏସି ଅଧକ୍ଷ୍ୟା ଦିପ୍ତିପ୍ରଭା ସ୍ୱାଇଁ, ଜିଲା ମୁଖ୍ୟ ଚିକିତ୍ସାଧିକାରୀ ଡ. ଦିପିକା ଦତ୍ତ ରାୟ, ହରଭଙ୍ଗା ବ୍ଲକ ଅଧ୍ୟକ୍ଷ ବିଶ୍ୱଜିତ ମିଶ୍ରଙ୍କ ସମେତ ତିନିବ୍ଲକର ବିଡିଓ, ତହସିଲଦାର ଓ ସମସ୍ତ ଜିଲାସ୍ତରୀୟ ଅଧିକାରୀମାନେ ଯୋଗଦେଇଥିଲେ। ଶେଷରେ ଜରୁରିକାଳୀନ ଅଧିକାରୀ ସୋନା ଟୁଡୁ ଧନ୍ୟବାଦ ପ୍ରଦାନ କରିଥିଲେ।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

Odia Pua is the first Odia News paper which is printed & Published from New Delhi & first Odia mobile news site.

© 2018 | Odiapua.com, All Rights Reserved. | Powered By Suryanandan.net

To Top