ଶ୍ରୀମନ୍ଦିର ପରିଚାଳନା କମିଟି ବୈଠକରେ ସ୍ୱତନ୍ତ୍ର ନୀତିନିର୍ଘଣ୍ଟ ଅନୁମୋଦିତ

ପୁରୀ:୨୩/୬ (ଓଡ଼ିଆ ପୁଅ/ବିଜୟ ପଟ୍ଟନାୟକ): ଶ୍ରୀମନ୍ଦିର ସମ୍ପର୍କରେ ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶକୁ କଡାକଡି ପାଳନ କରାଯିବ। ନିର୍ଦ୍ଦେଶର ଅନୁପାଳନ ପାଇଁ ଅଧିକ ୨୩ଟି ସିସିଟିଭିର ସହାୟତା ନିଆଯିବ ବୋଲି ଶ୍ରୀମନ୍ଦିର ପରିଚାଳନା କମିଟି ବୈଠକରେ ନିଷ୍ପତ୍ତି ହୋଇଛି। ଶ୍ରୀମନ୍ଦିର ପରିଚାଳନା କମିଟିର ସଭାପତି ଗଜପତି ମହାରାଜ ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଆଜି ପୂର୍ବାହ୍ନରେ ପରିଚାଳନା କମିଟିର ବୈଠକ ଅନୁଷ୍ଠିତ ହୋଇଥିଲା। ଆସନ୍ତା ସ୍ନାନଯାତ୍ରା ଓ ରଥଯାତ୍ରାକୁ ଶୃଙ୍ଖଳିତ କରିବା ପାଇଁ ନୀତିନିର୍ଘଣ୍ଟକୁ ଅନୁମୋଦନ କରିଛି କମିଟି। ଶଙ୍କରାଚାର୍ଯ୍ୟ ମଠକୁ ଶ୍ରୀମନ୍ଦିର ପ୍ରଶାସନ ପକ୍ଷରରୁ ଜମି ଫେରାଇବା ପାଇଁ ଉଦ୍ୟମ ଆରମ୍ଭ କରିବାକୁ ପରିଚାଳନା କମିଟିରେ ନିଷ୍ପତ୍ତି ହୋଇଛି। ଆଗକୁ ସ୍ନାନ ଓ ରଥଯାତ୍ରାର ସୁପରିଚାଳନା ପାଇଁ ଶ୍ରୀମନ୍ଦିର ପରିଚାଳନା କମିଟି ସ୍ୱତନ୍ତ୍ର ନୀତିନିର୍ଘଟକୁ ଅନୁମୋଦିତ କରିଛି। ସ୍ନାନଯାତ୍ରା ସହ ରଥଯାତ୍ରା ଆରମ୍ଭ କରି ନିଳାଦ୍ରୀବିଜେ ପର୍ଯ୍ୟନ୍ତ ଭକ୍ତଙ୍କ ଶୃଙ୍ଖଳିତ ଦର୍ଶନକୁ ପ୍ରଶାସନ ଗୁରୁତ୍ୱ ଦେବ ସୁପ୍ରିମକୋର୍ଟ ଭକ୍ତଙ୍କ ଦର୍ଶନ ବ୍ୟବସ୍ଥାକୁ ବ୍ୟବସ୍ଥିତ କରିବା ସହ ଦାନ ଓ ଦକ୍ଷିଣା ଆଦାୟ ଉପରେ କଟକଣା ଲଗାଇଛନ୍ତି। ଏଣୁ ଏହି ନିର୍ଦ୍ଦେଶକୁ ରଥଯାତ୍ରା ଅବସରରେ ପାଳନ କରିବାକୁ ଦୃଢ଼ ପଦକ୍ଷେପ ନିଆଯିବ। ଦାନ ଆଦାୟ ଭକ୍ତ ଓ ସେବାୟତଙ୍କ ଉପରେ ନଜର ରଖିବା ପାଇଁ ଅଧିକ ୨୩ଟି ସିସିଟିଭି ଲଗେଇବାକୁ ନିଷ୍ପତ୍ତି ହୋଇଛି। ସେହିପରି ରତ୍ନଭଣ୍ଡାର ଚାବି ବିବାଦ ସମ୍ପର୍କରେ ପରିଚାଳନା କମିଟି ରାଜ୍ୟ ସରକାରଙ୍କ ଦ୍ୱାରା ଗଠିତ ତଦନ୍ତ କମିଶନରଙ୍କ ରିପୋର୍ଟକୁ ଅପେକ୍ଷା କରିବ। ତା’ ପୂର୍ବରୁ ଏନେଇ ଆଲୋଚନା କିମ୍ବା କୌଣସି ନିଷ୍ପତ୍ତି ନନେବାକୁ ପରିଚାଳନା କମିଟିର ସହମତି ହୋଇଥିଲା। ଶଙ୍କରାଚାର୍ଯ୍ୟଙ୍କ ମଠ ଜମି ଏବେ ଶ୍ରୀମନ୍ଦିର ପ୍ରଶାସନ ଖାତାକୁ ଚାଲି ଆସିଥିବାରୁ ଏହାକୁ ମଠକୁ ଫେରସ୍ତ ଦେବା ପାଇଁ ପଦକ୍ଷେପ ନିଆଯାଇଛି। ଏ ସମ୍ପର୍କରେ ଗଜପତିଙ୍କ ଅଧ୍ୟକ୍ଷତାରେ ଏକ କମିଟି ଶଙ୍କରାଚାର୍ଯ୍ୟଙ୍କୁ ସାକ୍ଷାତ କରି ନିଷ୍ପତ୍ତି ନେବେ ବୋଲି ବୈଠକରେ ସ୍ଥିର ହୋଇଥିଲା। ଏହି ବୈଠକରେ ଜିଲ୍ଲାପାଳ ଅରବିନ୍ଦ ଅଗ୍ରୱାଲ, ଏସ୍ପି ସାର୍ଥକ ଷଡଙ୍ଗୀଙ୍କ ସହ ପରିଚାଳନା କମିଟିର ସଦସ୍ୟମାନେ ଯୋଗଦେଇ ଆଲୋଚନାରେ ଭାଗ ନେଇଥିଲେ।

Leave a Reply

Your email address will not be published. Required fields are marked *