ଲାଞ୍ଚନେଇ ଭିଜିଲାନ୍ସ ହାତରେ ଧରାପଡିଲେ ଛତିଆ ଆର.ଆଇ

ଯାଜପୁର ୨୪-୨ (ଓଡିଆ ପୁଅ/ମାନସ ରାଉତ):- ଯାଜପୁର ଜିଲ୍ଲା ବଡଚଣା ବ୍ଲକ ଦର୍ପଣ ତହସିଲ ଅନ୍ତର୍ଗତ ଛତିଆ ରାଜସ୍ୱ ନିରୀକ୍ଷକ ସ୍ମିତାରାଣୀ ମହାନ୍ତି ଶନିବାର ଏକ ଏନଜିଓ ସଂସ୍ଥାରୁ ଲାଞ୍ଚ ନେଉଥିବା ବେଳେ କଟକ ଭିଜିଲାନ୍ସ ହାତରେ ଧରାପଡିଥିବା ଜଣାଯାଇଛି। ଛତିଆ ଅଞ୍ଚଳର ଜମିଜମା ରିପୋର୍ଟ ପ୍ରଦାନ କରିବା ପାଇଁ ଏକ ଏନଜିଓ ସଂସ୍ଥାକୁ ବାରମ୍ବାର ହଇରାଣ କରିବା ପରେ ଲାଞ୍ଚ ନଦେଲେ ରିପୋର୍ଟ ଦିଆଯାଇପାରିବ ନାହିଁ ବୋଲି ଇଂଗିତ ଦେଇଥିଲେ। ଏହା ଜାଣିବା ପରେ ସଂପୃକ୍ତ ଏନଜିଓ ସଂସ୍ଥା ପକ୍ଷରୁ କଟକ ଭିଜିଲାନ୍ସ ଅଧିକାରୀଙ୍କୁ ଅବଗତ କରିଥିଲେ। ପୂର୍ବ ନିର୍ଦ୍ଧାରିତ ଯୋଜନା ଅନୁସାରେ ଶନିବାର ପ୍ରାୟ ଦିନ ୧୨ଟା ସମୟରେ କଟକ ଭିଜିଲାନ୍ସ ବିଭାଗ ଅଧିକାରୀ ମାନେ ଛତିଆ ରାଜସ୍ୱ ନିରୀକ୍ଷକ କାର୍ଯ୍ୟାଳୟ ନିକଟରେ ପ୍ରସ୍ତୁତ ହୋଇରହିଥିଲେ। ଏହି ସମୟରେ ସଂପୃକ୍ତ ଏନଜିଓ ସଂସ୍ଥା ପକ୍ଷରୁ ଛତିଆ ରାଜସ୍ୱ ନିରୀକ୍ଷକଙ୍କୁ ୧ ହଜାର ଟଙ୍କା ଲାଞ୍ଚ ପ୍ରଦାନ କରାଯିବା ସମୟରେ ଭିଜିଲାନ୍ସ ଅଧିକାରୀମାନେ ରାଜସ୍ୱ ନିରୀକ୍ଷକ ସ୍ମିତାଞ୍ଜଳୀଙ୍କ ନିକଟରୁ ଲାଞ୍ଚ ଅର୍ଥ ଜବତକରିବା ସହ ତାଙ୍କୁ ଗିରଫକରି କଟକ ଭିଜିଲାନ୍ସ ବିଭାଗକୁ ଅଧିକ ପଚରା ଉଚରା ପାଇଁ ନେଇଯାଇଥିଲେ। ଆର.ଆଇଙ୍କ ନିଜସ୍ୱ ବିଞ୍ଝାରପୁର ସ୍ଥିତ ବାସଭବନରେ ଚଢାଉ ଜାରୀ ରହିଥିବା ଭିଜିଲାନ୍ସ ଡିଏସପି ଅନୁଶୟା ସେନାପତି ପ୍ରକାଶ କରିଛନ୍ତି। ପ୍ରକାଶଥାଉକି ଠିକ ଦୁଇ ମାସ ପୂର୍ବରୁ ଦର୍ପଣ ତହସିଲ ଅଧିନସ୍ଥ ଖଏରା ରାଜସ୍ୱ ନିରୀକ୍ଷକ ଲାଞ୍ଚ ନେଉଥିବା ବେଳେ ମଧ୍ୟ ଭିଜିଲାନ୍ସ ହାତରେ ଧରାପଡିଥିଲେ। ତେବେ ଦୁଇ ମାସ ମଧ୍ୟରେ ଦୁଇ ଜଣ ରାଜସ୍ୱ ନିରୀକ୍ଷକ ଭିଜିଲାନ୍ସ ହାତରେ ଧରାପଡିବାକୁ ନେଇ ବିଭାଗୀୟ ଅଧିକାରୀଙ୍କ ସ୍ୱଚ୍ଛତା ଉପରେ ନାନା ପ୍ରଶ୍ନବାଚି ସୃଷ୍ଟିକରିଛି।

Leave a Reply

Your email address will not be published. Required fields are marked *