ମୋ ଗାଆଁରେ ସଞ୍ଜ

ବିନୟ ଭୂଷଣ ମହାପାତ୍ର

ପଶ୍ଚିମାକାଶେ ମନବିରସେ ସୂରୁଜ ଗଲେ ବୁଡି।
ଚଡେଇଜାକ ବସାକୁ ତାଙ୍କ ଆସିଲେଣି ତ ଉଡି ॥

ଗାୟାଳ ଭାଇ ଗାଈଙ୍କୁ ନେଇ ଆସଇ ପାଟୁଁ ଫେରି।
ଗାଈକୁ ବାନ୍ଧି କୁଳୁଚି ହାଣ୍ଡି ଆଣିଲେ ବାପା ଧରି ॥

ମଲ୍ଲି-ମାଲତୀ ଚମ୍ପା-କେତକୀ ଆହୁରି କେତେ ଫୁଲ।
ଫୁଟି ଗଲେଣି ବାଡିରେ ପୁଣି ମହକେ ମନ ପ୍ରାଣ ॥

ହଳୁଆ ଭାଇ ହଳ ଫିଟାଇ ଆସଇ ଗୋରୁ ଆଣି।
ଜୁଆଳି କାଢି ଗୁହାଳେ ବାନ୍ଧି ଦିଅଇ ନଡା ପାଣି ॥

ଛାଡିଣ ଗାତ ଦେଲେଣି ଡାକ ବିଲୁଆ ପାଳି କରି।
କୁକୁର ପଲ ହୋଇଣ ମେଳ ତାଳରେ ଦେଲେ ହୁରି ॥

ଚଉଁରା ମୂଳେ ସଳିତା ଜାଳେ ଘରର ଟିକି ଝିଅ।
ଠାକୁର ଘରେ ପାର୍ଥନା କରେ ଦୀପରେ ଦେଇ ଘିଅ ॥

ସାରିକି ଖେଳ ଛାଡିକି ମେଳ ପିଲାଏ ଆସିଲେଣି।
ଗୋଡକୁ ଧୋଇ ବସ୍ତାନି ନେଇ ପଢାରେ ବସିଲେଣି ॥

ଶୁଭିଲା ଗୀତ ଶ୍ରୀ ଭାଗବତ ଟୁଙ୍ଗିରୁ ନନାଙ୍କର।
କୃଷ୍ଣଚରିତ ଲୀଳା ଅମୃତ ସକଳ ପାପହର ॥

ମୃଦଙ୍ଗ ତାଳେ ନାଚନ୍ତି ଭୋଳେ ଜପନ୍ତି ହରିନାମ।
ଥକନ୍ତି ନାହିଁ କେବେ ବି କେହି ଦିନରେ କରି କାମ ॥

ଧରିକି ବାଡି କୋଦାଳ କୋଡି ଧନୁଆ ଭାଇ ପୁଣି।
ମାହାରା କରି ମଡାଏ ପାଣି ମୁଠାରେ ସାର ବୁଣି ॥

ତାରକାମାନେ ଦୂରଗଗନେ ହେଲେଣି ମିଞ୍ଜି ମିଞ୍ଜି।
ତୋରଣ ଟାଣି ଆଲୋକ ପୁଣି ଦେଲାକି କେହି ଖଞ୍ଜି ॥

ରିମୋଟ ଧରି ଆସନ ପାରି ବସି ଗଲେଣି ଜେଜେ।
ଗୀତ ସମ୍ବାଦ ଧାରାବାହିକ ଦେଖିବା ପାଇଁ ମଜେ ॥

ପରିବା କଟା ବେସର ବଟା କାମ ଯେ ବୋଉ ସାରି।
ଭାତକୁ ଗାଳି ବଘାରି ଡାଲି ରାନ୍ଧନ୍ତି ତରକାରୀ ॥

ପୂର୍ଣ୍ଣମୀ ଜହ୍ନ ଦେଖି ଉଚ୍ଛନ୍ନ ଯୁବତୀ ଝିଅ ମନ।
ଖେଳନ୍ତି ପୁଚି ଖୁସିରେ ନାଚି ପାଟିରେ ଖାଇ ପାନ ॥

ଅନ୍ଧାର ଅତି ଦୁଲୁକେ ଛାତି ଅମାବାସ୍ୟାର ତିଥି।
ଖଦ୍ୟୋତ ପୋକ ଉଡେ ଅନେକ ଜଳେଇ ଦେଇ ବତୀ ॥

ଧାନ କିଆରୀ ନଈ ପୋଖରୀ ଛୁଇଁ କି ବହେ ବାଆ।
ଦିନର ଝାଞ୍ଜି ଯାଏ କି ହଜି ଦେହକୁ ଦିଏ ରାହା ॥

ପବନ ବହେ ଥରାଇ ଦିଏ ଦେହକୁ ଶୀତ ସଂଜେ।
ନିଆଁକୁ ଜାଳି ବସନ୍ତି ମେଳି ଦେହରେ ଦେହ ବାଜେ ॥

ବରଷା ପାଣି ତାଳରେ ପୁଣି ବେଙ୍ଗୁଲି ଦିଏ ଡାକ।
ବାଉଁଶ ବଣେ ଡାହୁକ ଗୁଣେ ଉଡଇ ଝରି ପୋକ ॥

ସଂଜର ବେଳେ ଅନ୍ଧାର କୋଳେ ଗାଆଁ ମୋ ଯାଏ ଶୋଇ।
ସତେକି କିଏ ଘୋଡାଇ ଦିଏ କଳା ଚାଦର ନେଇ ॥

ଆଲୋକ ପରେ ଅନ୍ଧାର ଭରେ ସମୟ ଚକ ଗଡି।
ଅନ୍ଧାର ଗଲେ ଆଲୋକ ଭଲେ ଆସେ ଯେ ପୁଣି ମାଡି ॥

ଜଗତକର୍ତ୍ତା ଦୈବ ବିଧାତା କରନ୍ତି ସବୁ କିଛି।
ଏ ଭବ ବନେ ତାଙ୍କ ବିହୁନେ ନାହିଁ ତ ଅନ୍ୟ ଗତି ॥

ଅଡିଟର୍,
ଡିଫେନ୍ସ୍ ଏକାଉଣ୍ଟସ୍ ଡିପାଟମେଣ୍ଟ୍,
ପିଏଓ(ଓଆରଏସ୍)ଏ.ଆର୍.ସି,
ହାପ୍ପୀ ଭେଲି,
ସିଲଙ୍ଗ, ମେଘାଳୟ

Binaya Bhushan Mohapatra

Date of birth - 23/04/1983. Place of birth - Jajpur, Odisha. Ex Job - Indian Navy : 2002 - 2017. Present Job - Auditor, Defence Accounts Department, Shillong, Meghalaya.

Leave a Reply

Your email address will not be published. Required fields are marked *