ଓଡ଼ିଶା

ମହାପ୍ରୟାଣ ଗାଡି ଶିଶୁପୁତ୍ରର ଶବକୁ ରାସ୍ତାରେ ଛାଡି ପଲାଇଲା

କେନ୍ଦ୍ରାପଡା ୯/୧(ଓଡିଆ ପୁଅ/ଚିତ୍ତରଞ୍ଜନ ଦାସ )- ମାତ୍ର ଛଶହ ଟଙ୍କା ନଦେଇ ପାରିବାରୁ କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟରୁ ଜଣେ ୪ବର୍ଷର ପିଲାର ଶବ ନେଇ ହାତିଆ ଗ୍ରାମରେ ଛାଡିବାକୁ ଯାଉଥିବା ସରକାରଙ୍କ “ମହାପ୍ରୟାଣ ଗାଡି” ସୋମବାର ସନ୍ଧ୍ୟାରେ ସେହି ପିଲାର ଶବକୁ ୫ନମ୍ବର (କ)ଜାତୀୟ ରାଜପଥର ଗୋପଛକ ନିକଟରେ ଛାଡିଦେଇ ପଳାଇଯିବା ଘଟଣା ସାଧାରଣରେ ଅମାନବିକତାର ସଦ୍ୟ ଉଦାହରଣ ହୋଇଯାଇଛି। ଘଟଣାରୁ ପ୍ରକାଶ ଯେ କେନ୍ଦ୍ରାପଡା ଜିଲ୍ଲାର ମାର୍ଶାଘାଇ ବ୍ଲକ ଅନ୍ତର୍ଗତ ଇନ୍ଦୁଳିଆ ପଂଚାୟତର ହାତିଆ ଗ୍ରାମର ଦେବାଶିଷ ମହାପାତ୍ରଙ୍କ ୪ବର୍ଷର ପୁଅ ସତ୍ୟରଞ୍ଜନ ଆଜି ଘର ପାଖରେ ଖେଳୁଥିବା ସମୟରେ ନିକଟରେ ଥିବା ଏକ ପୋଖରୀ ପାଖକୁ ଚାଲି୍ିଯାଇ ପାଖରୀରେ ବୁଡିଯାଇଥିଲା। ପରିବାର ଲୋକେ ତାକୁ ଖୋଜାଖୋଜି କରି ପୋଖରୀରୁ ଉଦ୍ଧାରକରି ପ୍ରଥମେ ମାର୍ଶାଘାଇ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ସତ୍ୟରଞ୍ଜନକୁ ଭର୍ତ୍ତି କରିଥିଲେ। ଜିଲ୍ଲା ଚିକିତ୍ସାଳୟରେ ଡାକ୍ତର ତାକୁ ମୃତ ଘୋଷଣା କରିଥିଲେ। ଦେବାଶିଷଙ୍କ ପରିବାର ଅତ୍ୟନ୍ତ ଗରୀବ ହୋଇଥିବାରୁ ସେ ପୁଅର ଶବକୁ ନିଜ ଗ୍ରାମକୁ ନେବା ପାଇଁ ଅନ୍ୟ ଉପାୟ ନପାଇ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଅନୁରୋଧ କରି ପୁଅର ଶବକୁ ସରକାରଙ୍କ “ମହାପ୍ରୟାଣ ଗାଡି”ରେ ଛଶହ ଟଙ୍କାରେ ନେବା ପାଇଁ ଅନୁମତି ପାଇଲେ। କିନ୍ତୁ ସେହି ମହାପ୍ରୟାଣ ଗାଡିଟି ମୁଖ୍ୟ ଚିକିତ୍ସାଳୟରୁ ତାଙ୍କ ପୁଅର ଶବନେଇ ମାତ୍ର ଏକ କିଲୋମିଟର ରାସ୍ତା ଯିବାପରେ ସ୍ଥାନୀୟ ଗୋପଛକ ନିକଟରେ ସେହି ଗାଡିର ଚାଳକ ଟଙ୍କା ମାଗିଥିଲା। ପରିବାର ଲୋକଙ୍କ ନିକଟରେ ସେତେବେଳେ ଛଶହ ଟଙ୍କା ନଥିବାରୁ ଘରେ ପହଁଚିଲେ ଟଙ୍କା ଦେବେ ବୋଲି କହିବାରେ ମହାପ୍ରୟାଣ ଗାଡିର ଚାଳକ ଶବ ସହିତ ପରିବାର ଲୋକଙ୍କୁ ଗୋପଛକ ନିକଟରେ ଓହ୍ଲାଇ ଦେଇ ଏତେବାଟ ଯାଇପାରିବ ନାହିଁ ବୋଲି କହି ସେଠାରୁ ଫେରି ଯାଇଥିଲା। ବିଚରା ଦେବାଶିଷ ଅନ୍ୟ କୈାଣସି ଉପାୟ ନପାଇ ଅନ୍ୟ ଜଣେ ବ୍ୟକ୍ତିଙ୍କୁ ବହୁତ ଅନୁରୋଧ କରି ପୁଅର ଶବକୁ ଏକ ବାଇକରେ ନେଇ ନିଜ ଗ୍ରାମକୁ ଯିବାପାଇଁ ବାଧ୍ୟ ହୋଇଥିଲା। ଏଭଳି ଅଭାବନୀୟ ଓ ଅମାନବିକତା ଘଟଣା ସାଧାରଣରେ ଆଶ୍ଚର୍ଯ୍ୟ ଚକିତ କରିଥିବା ବେଳେ ସମ୍ପୃକ୍ତ ମହାପ୍ରୟାଣ ଗାଡିର ଚାଳକଙ୍କ ଦାୟିତ୍ୱହୀନତା ପାଇଁ ଆଜି ଯେଉଁ ଅମାନବିୟ ଘଟଣା ଘଟିଲା ସେଥିପ୍ରତି ଜିଲ୍ଲା ପ୍ରଶାସନ ଓ ରାଜ୍ୟ ସରକାର ଦୃଷ୍ଟାନ୍ତ ମୂଳକ କାର୍ଯ୍ୟାନୁଷ୍ଠାନ ନେବା ସହ ଭବିଷ୍ୟତରେ ଏଭଳି ଘଟଣାର ପୁନରାବୃତି ନହେବା ପାଇଁ ଯଥେଷ୍ଟ ଧ୍ୟାନଦେବା ଆବଶ୍ୟକ ବୋଲି ସାଧାରଣରେ ଦାବି ହୋଇଛି। ଏଠାରେ ସୂଚନା ଯୋଗ୍ୟ ଯେ ସାଂସଦ ପାଣ୍ଠିରୁ କିଣାଯାଇଥିବା ଏହି ମହାପ୍ରୟାଣ ଗାଡିକୁ ଗତ ଅକ୍ଟୋବର ମାସ ୩ତାରିଖରେ କେନ୍ଦ୍ରାପଡା ଲୋକସଭା ସାଂସଦ ବୈଜୟନ୍ତ ପଣ୍ଡା ଉଦଘାଟନ କରିଥିଲେ।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

Odia Pua is the first Odia News paper which is printed & Published from New Delhi & first Odia mobile news site.

© 2018 | Odiapua.com, All Rights Reserved. | Powered By Suryanandan.net

To Top