ଭଦ୍ରକ : ପର୍ଯ୍ୟଟକଙ୍କ ପାଇଁ ଉଡାବାଲିରେ ହେବ ଇକୋ ଟୁରିଜିମ ପାର୍କ

ଭଦ୍ରକ, ୧୩ା୧ (ଓଡ଼ିଆ ପୁଅ / ପ୍ରମୋଦ ରାୟ) : ଭଦ୍ରକ ଜିଲାରେ ଲୁଣା ଜଙ୍ଗଲ ବୃଦ୍ଧି ପାଉଥିବାରୁ ପରିବେଶ ପ୍ରେମୀଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି। କେନ୍ଦ୍ରାପଡା ଜିଲାର ବିଶ୍ୱ ବିସ୍ମୟ ଭିତରକନିକା ଓ କାଳିଭଞ୍ଜଡିଆ ଲୁଣା ଜଙ୍ଗଲ ଭାବେ ଖ୍ୟାତି ଅର୍ଜନ କରିଥିବା ବେଳେ ଭଦ୍ରକ ଜିଲା ଚାନ୍ଦବାଲି ତହସିଲର ଧାମରା ଦୋସିଙ୍ଗା ଉପକୂଳରେ ୪୬୫.୬୩ ହେକ୍ଟର ପରିମିତ ଉଡାବାଲି (କନିକା ବାଲି) ଯାହାକି ଧାମରା ମୁହାଁଣ ଟପୋ ମାନଚିତ୍ର (୧୯୩୦)ରେ ଅକ୍ଷାଂଶ ୨୦.୪୮’ ଉତ୍ତର, ଓ ଦ୍ରାଘିମା ୮୭.୦୦’ ପୂର୍ବକୁ ଚାନ୍ଦବାଲି ବ୍ଲକ ଅନ୍ତର୍ଗତ ଦୋସିଙ୍ଗା ଗ୍ରାମର ପୂର୍ବ ଏବଂ ବାଲିସାହି ପଏତ୍ତର ଦକ୍ଷିଣ-ପୂର୍ବରେ ଅବସ୍ଥିତ ଏହା ଧାମରା ବାଣିଜ୍ୟ ବନ୍ଦର (ଆଦାନୀ)ର ଅପର ପାଶ୍ୱର୍ରେ ଅବସ୍ଥିତ ଫଳରେ ପବନ ଓ ସମୁଦ୍ର ଢେଉରୁ ପୋତାଶ୍ରୟକୁ ସୁରକ୍ଷା ଦେଉଛି। ଏହାବାଦ୍ ୨୧.୨୫ ହେକ୍ଟର ଲଙ୍ଗ ହୁଇଲର, ୩୯.୪୬ ହେକ୍ଟର କୋକାନଟ୍ ଆଇଲାଣ୍ଡ, ୪.୩୦ ହେକ୍ଟର ସ୍ମଲ ହୁଇଲର, ୧୬.୯୦ ହେକ୍ଟର ସଟ୍ ଆଇଲାଣ୍ଡ (ବୁଦ୍ଧିଆବାଲି) ଏବଂ ୧୦୬.୪୯ ହେକ୍ଟର ବାବୁବାଲିରେ ଲୁଣା ଜଙ୍ଗଲ ଅଛି। ଖୁସିର କଥା ଏବେ କାଣ୍ଡନାଳି ପାଖରେ ବୈତରଣୀ ନଦୀରେ ୧୨ ହେକ୍ଟର ପରିମିତ ନିୟୁ ଆଇଲାଣ୍ଡରେ ଲୁଣା ଜଙ୍ଗଲ ସୃଷ୍ଟି ହୋଇଛି। ଏଥିସହ ଧାମରା ଠାରୁ ଚନ୍ଦନୀପାଳ ପର୍ଯ୍ୟନ୍ତ ୪୦୦.୬୫ ହେକ୍ଟର ଗରମାଳ ମୁଖ୍ୟତଃ ହରକ ଓ ହେନ୍ତାଳ ଗଛ ଥିବା ଲୁଣା ଜଙ୍ଗଲ ଅଛି। ଏହାଛଡା କଇଥକୋଲ୍ଲା ପଞ୍ଚାୟତର ଗୌରପ୍ରସାଦ, ଶରତପ୍ରସାଦ, କରଞ୍ଜମାଳ ପଞ୍ଚାୟତର ନରେନ୍ଦ୍ରପୁର, ହୃଦୟପ୍ରସାଦ, ଧାନକୁଟା, ବଇଁଚା ଏବଂ କରଣପଲ୍ଲି ପଞ୍ଚାୟତର କୁଅାଁମରା, ବିଜୟପାଟଣା ଓ କରଣପଲ୍ଲୀ ଗ୍ରାମର ଉପକୂଳ ପଠାରେ ଜାଇକା ପ୍ରୋଜେକ୍ଟ ମାଧ୍ୟମରେ ଫିସ୍ଥ୍ରୋନ ପଦ୍ଧତ୍ତିରେ ୩ ହଜାର ୪୬୭.୦୩ ହେକ୍ଟରରେ ଲୁଣା ଜଙ୍ଗଲ ସୃଷ୍ଟି କରାଯାଛି। ଏହିସବୁ ଲୁଣା ଜଙ୍ଗଲ ଭଦ୍ରକ ବନ୍ୟପ୍ରାଣୀ ବନଖଣ୍ଡର ଚାନ୍ଦବାଲି ରେଞ୍ଜ ଏରିଆ ମଧ୍ୟରେ ଆସୁଥିବା ବେଳେ ଏହାକୁ ପର୍ଯ୍ୟଟକ କିମ୍ବା ପରିବେଶପ୍ରେମୀଙ୍କୁ ଆକୃଷ୍ଟ କଲାପରି କୌଣସି ପଦକ୍ଷେପ ନିଆଯାଇନାହିଁ। ତେବେ ଏହିସବୁ ଲୁଣା ଜଙ୍ଗଲକୁ ସୁରକ୍ଷିତ ରଖିବା ସହ ପର୍ଯ୍ୟଟକଙ୍କୁ କିରି ଆକୃଷ୍ଟ କରାଯାଇ ପାରିବ ସେଥିପାଇଁ ଚାନ୍ଦବାଲି ବିଧାୟକ ବ୍ୟୋମକେଶ ରାୟଙ୍କ ନେତୃତ୍ୱରେ ଚାନ୍ଦବାଲି ପଞ୍ଚାୟତ ସମିତି ଅଧ୍ୟକ୍ଷାଙ୍କ ପ୍ରତିନିଧି ରଞ୍ଜନ ସାହୁ, ପରିବେଶବୀତ ସୁଧୀର ମହାନ୍ତି, ପ୍ରାକ୍ତନ ଅଧ୍ୟକ୍ଷ ନରେଶ ମାଝୀ, ରଘୁନାଥ ସାହୁ, ସତ୍ୟବୀର ପ୍ରତାପ ରାଏ, ସୁଭେନ୍ଦୁ ସାହୁ, ରେଞ୍ଜ ଅଫିସର ପ୍ରଫୁଲ୍ଲ ସାହୁ, ଫରେଷ୍ଟଗାର୍ଡ ଗଦାଧର ବିଶ୍ୱାଳ ପ୍ରମୁଖ ଇତିମଧ୍ୟରେ ବର୍ଣ୍ଣିତ ଲୁଣାଜଙ୍ଗଲ ଓ ବାଲି ଦୀପଗୁଡିକ ପରିଦର୍ଶନ କରିଥିଲେ। ବିସ୍ତୀଣ୍ଣ ର୍ ସମୁଦ୍ରର ଜଳରାଶି, ପ୍ରାକୃତିକ ସୌନ୍ଦର୍ଯ୍ୟରେ ପରିପୂଣ୍ଣ ର୍ ଉଡାବାଲି (କନିକାବାଲି)ରେ ଏକ ଇକୋ ଟୁରିଜିମ୍ ପାର୍କ ପ୍ରତିଷ୍ଠା ପାଇଁ ପ୍ରକୃଷ୍ଟ ସ୍ଥାନ। ବୈତରଣୀ ନଦୀ ଓ ସମୁଦ୍ରରେ ନୌବିହାର, ଦୂରରୁ ଧାମରା ବନ୍ଦରର ଦୃଶ୍ୟ ଏବଂ ଉଡାବାଲିର ମନୋରମ ପରିବେଶ ନିଶ୍ଚିତ ପର୍ଯ୍ୟଟକଙ୍କୁ ଆନନ୍ଦ ପ୍ରଦାନ କରିବା ସହ ଆକର୍ଶିତ କରିବ ବୋଲି ବିଧାୟକ ଶ୍ରୀ ରାୟ ଏକ ପ୍ରେସ ବିବୃତିରେ ପ୍ରକାଶ କରିଛନ୍ତି। ଏଥିପାଇଁ ସେ ସରକାରଙ୍କ ନିକଟରେ ଖୁବ୍ ଶୀଘ୍ର ଦାବି ଉପସ୍ଥାପନ କରିବେ ବୋଲି ପ୍ରକାଶ କରିଛନ୍ତି। ଏ ସଂପର୍କରେ ଭଦ୍ରକ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଅମ୍ଳାନ ନାୟକଙ୍କୁ ପଚାରିବାରୁ ‘ଉଡାବାଲି’ (କନିକା ବାଲିଦୀପ)ର ଇକୋ ଡେଭେଲପମେଣ୍ଟ ପାଇଁ ଧାମରା ବାଣିଜ୍ୟିକ ବନ୍ଦର ଚୁକ୍ତି କରି ପ୍ରତିବଦଳରେ ବନ୍ଦର ପ୍ରତିଷ୍ଠା କରିବା ପାଇଁ ଅନୁମତି ପାଇଛି। ଏଣୁ ଉଡାବାଲିର ଜୈବ ବିବିଧତାର ବିକାଶ ପାଇଁ ୨ କୋଟି ଟଙ୍କାର ପ୍ରକଳ୍ପ ପ୍ରସ୍ତାବ ସେ ଜଙ୍ଗଲ ଓ ପରିବେଶ ବିଭାଗର ପ୍ରିନ୍ସପାଲ ସେକ୍ରେଟାରୀଙ୍କ ନିକଟରେ ଦାଖଲ କରିଛନ୍ତି। ଏହା ମଞ୍ଜୁର ହେଲେ ଧାମରା ପୋର୍ଟ କଂପାନୀ(ଆଦାନୀ) ସହାୟତାରେ ଏହି ପ୍ରକଳ୍ପର କାର୍ଯ୍ୟ ଆରମ୍ଭ ହେବ ବୋଲି ଡିଏଫଓ ଶ୍ରୀ ନାୟକ ପ୍ରକାଶ କରିଛନ୍ତି। ତେବେ ଏହି ଦୀପ ଇକୋ ଟୁରିଜିମ୍ ପାର୍କର ମାନ୍ୟତା ପାଇଲେ ଚାନ୍ଦବାଲି ଓ ଧାମରାରେ ଦେଶୀ, ବିଦେଶୀ ପର୍ଯ୍ୟଟକଙ୍କ ଭିଡ ଜମିବ ବୋଲି ସାଧାରଣରେ ଚର୍ଚ୍ଚା ହେଉଛି।

Leave a Reply

Your email address will not be published. Required fields are marked *