ବିଶ୍ୱ ହିନ୍ଦୁ ପରିଷଦ ପକ୍ଷରୁ ବୁଦ୍ଧିଜୀବୀ ସମ୍ମିଳନୀ

ଭଦ୍ରକ, ୨୩ା୧୦ (ଓଡ଼ିଆପୁଅ / ପ୍ରମୋଦ ରାୟ) : ଭଦ୍ରକ ଗାନ୍ଧି ପଡିଆ ସ୍ଥିତ ସୀତାରାମ କଲ୍ୟାଣ ମଣ୍ଡପରେ ବିଶ୍ୱ ହିନ୍ଦୁ ପରିଷଦ ପକ୍ଷରୁ ବୁଦ୍ଧିଜୀବୀ ସମ୍ମିଳନୀ ଅନୁଷ୍ଠିତ ହୋଇ ଯାଇଛି। ଏହି ସମ୍ମିଳନୀରେ ବିଶ୍ୱ ହିନ୍ଦୁ ପରିଷଦର ରାଜ୍ୟ ସଭାପତି ତଥା ଅବସରପ୍ରାପ୍ତ ପୁଲିସ ସହକାରୀ ମହା ନୀରିକ୍ଷକ ଅରୁଣ କୁମାର ଉପାଧ୍ୟାୟ ମୁଖ୍ୟବକ୍ତା ଭାବେ ଯୋଗ ଦେଇ କହିଥିଲେ ଯେ ଭାରତରେ ସାଂପ୍ରତିକ ସ୍ଥିତି ସୁରକ୍ଷା ଦୃଷ୍ଟିରୁ ଅତି ଜଟିଳ ପରିସ୍ଥିତି ଦେଇ ଗତି କରୁଛି। ଏଥି ପାଇଁ ରାଷ୍ଟ୍ରୀୟ ସୁରକ୍ଷାରେ ସମସ୍ତଙ୍କର ଅବଦାନ ରହିବା ଉଚିତ। ଇଂରେଜମାନେ ତୃଟିପୂର୍ଣ୍ଣ ଇତିହାସ ଉଦ୍ଦେଶ୍ୟ ମୂଳକ ଭାବରେ ରଚନା କରି ଭାରତୀୟଙ୍କର ଶୌର୍ଯ୍ୟକୁ ନ୍ୟୁନ କରି ଦେଖାଇଛନ୍ତି। ତାହାକୁ ବଦଳାଇବାକୁ ପଡିବ। ଏ କ୍ଷେତ୍ରରେ ସମସ୍ତଙ୍କର ସହଯୋଗ କାମନା କରିଥିଲେ। ସମ୍ମିଳନୀର ଅନ୍ୟତମ ଅତିଥି ବଜରଙ୍ଗ ଦଳର ରାଜ୍ୟ ସଂଯୋଜକ ତଥା ଉକ୍ତ କାର୍ଯ୍ୟକ୍ରମର ମୁଖ୍ୟ ଉଦ୍ୟୋକ୍ତା ମାନସ ରଞ୍ଜନ ମହାନ୍ତି ହିନ୍ଦୁ ସଂସ୍କୃତିର ସୁରକ୍ଷା ପାଇଁ ସମାଜର ପ୍ରତ୍ୟେକ ଶ୍ରେଣୀର ଲୋକମାନେ ଆଗେଇ ନ ଆସିଲେ ଭାରତର ଅଖଣ୍ଡତା ବିପନ୍ନ ହେବ। ଭ୍ରଷ୍ଟାଚାର ମୁକ୍ତ ସମାଜ ଗଠନ ପାଇଁ ବ୍ୟକ୍ତି ନିଜକୁ ସଚେତନ କରିବା ଆବଶ୍ୟକ ନଚେତ ରାଷ୍ଟ୍ର ପ୍ରକୃତ ବିକାଶ ପଥରେ ଆଗେଇ ପାରିବ ନାହିଁ। ବିଭାଗ ସଂପାଦକ ଗୋବିନ୍ଦ ଚନ୍ଦ୍ର ରାଉତ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ସଭାପତି ବିଜୟ କୁମାର ସିନ୍ହା ମଞ୍ଚସ୍ଥ ଥିଲେ। ସ୍ୱାଧୀନ ସୁନ୍ଦର ଦାସ ଅତିଥି ପରିଚୟ ପ୍ରଦାନ କରିଥିଲେ। ଆଗାମୀ ଡିସେମ୍ବର ମାସରେ ଭୁବନେଶ୍ୱର ଠାରେ ହେବାକୁ ଥିବା ବିଶ୍ୱ ହିନ୍ଦୁ ପରିଷଦର ଅନ୍ତରାଷ୍ଟ୍ରୀୟ ଅଧିବେଶନ ସଂପର୍କରେ ଶ୍ରୀ ମହାନ୍ତି ସୂଚନା ପ୍ରଦାନ କରିଥିଲେ। ଆଜିର ଏହି ସମ୍ମିଳନୀରେ ଭଦ୍ରକର ବହୁ ବରିଷ୍ଠ ଆଇନଜୀବୀ, ସାହିତ୍ୟିକ, ଅଧ୍ୟାପକ, ଅବସରପ୍ରାପ୍ତ ସରକାରୀ ଅଧିକାରୀ, ବ୍ୟବସାୟୀ ଏବଂ ଶତାଧିକ ସମାଜସେବୀ ଯୋଗ ଦେଇଥିଲେ। କାର୍ଯ୍ୟକ୍ରମକୁ ବିଶ୍ୱ ହିନ୍ଦୁ ପରିଷଦ ଓ ବଜରଂଗ ଦଳର କାର୍ଯ୍ୟକର୍ତ୍ତା ମାନେ ସଂଚାଳନ କରିଥିଲେ।

Leave a Reply

Your email address will not be published. Required fields are marked *