ଫକୀରମୋହନ ଏବେବି ଅନତିକ୍ରମଣୀୟ ସାହିତ୍ୟସ୍ରଷ୍ଟା ଭଦ୍ରକରେ ଫକୀରମୋହନ ଜୟନ୍ତୀ ପାଳିତ

ଭଦ୍ରକ, ୧୫ା୧ (ଓଡ଼ିଆ ପୁଅ / ପ୍ରମୋଦ ରାୟ) : ସମୟର ବିବର୍ତ୍ତନ ଓ ଅଗ୍ରଗତି ସହ ତାଳ ଦେଇ ଓଡ଼ିଆ ସାରସ୍ୱତ କ୍ଷେତ୍ରରେ ଅନେକ ପରିବର୍ତ୍ତନ ଆସିବା ସତ୍ତ୍ୱେ ଓଡ଼ିଆ ଭାଷା ସାହିତ୍ୟର ଅନ୍ୟତମ ତ୍ରାଣକର୍ତ୍ତା ସଂକ୍ରାନ୍ତି ପୁରୁଷ ଫକୀରମୋହନ ସେନାପତି ଆମ ସାହିତ୍ୟରେ ଏବେବି ଅନତିକ୍ରମଣୀୟ ହୋଇ ରହିଛନ୍ତି ବୋଲି ଭଦ୍ରକସ୍ଥିତ ମହେନ୍ଦ୍ର ଭବନ ପରିସର ବିବେକାନନ୍ଦ ପାଠ ଭବନରେ ଆୟୋଜିତ ଫକୀରମୋହନ ଜୟନ୍ତୀରେ ମତ ପ୍ରକାଶ ପାଇଛି। ଡ଼ାକ୍ତର ଦୁର୍ଯେ୍ୟାଧନ ଦାସଙ୍କ ପୌରହିତ୍ୟରେ ଅନୁଷ୍ଠିତ ସଭାରେ ଇଂ ବିମ୍ବାଧର ବ୍ରହ୍ମ ଅତିଥିଙ୍କୁ ମଞ୍ଚ ଆମନ୍ତ୍ରଣ କରିଥିଲେ। ଜୟନ୍ତୀ କମିଟିର ଆବାହକ କବି ଅଭିଜିତ ନାୟକ ସଭାର ଉଦ୍ଦେଶ୍ୟ ଜ୍ଞାପନ ସହ ସ୍ୱାଗତ ସମ୍ଭାଷଣ ପ୍ରଦାନ କରିଥିଲେ। ସମ୍ମାନିତ ଅତିଥି କବି ହୃଦାନନ୍ଦ ପାଣିଗ୍ରାହୀ ବ୍ୟାସକବିଙ୍କ ବହୁବର୍ଣ୍ଣା କାବ୍ୟସ୍ୱର ଉପରେ ନିଜର ସୁଚିନ୍ତିତ ବକ୍ତବ୍ୟ ଉପସ୍ଥାପନ କରିଥିଲେ। ଏବଂ ଅନ୍ୟତମ ସମ୍ମାନିତ ଅତିଥି ସ୍ତମ୍ଭକାର ଅଭୟ ଦିବେଦୀ ଫକୀରମେହାନଙ୍କ ଜୀବନୀ ସାହିତ୍ୟ, ସାହିତ୍ୟର ଏହି ବିଭବକୁ ନୂଆ ଦିଶା ଦେଖାଇଛି ବୋଲି ପ୍ରକାଶ କରିବା ସହ ଏହାର ମହକ ଆମକୁ ଚିରକାଳ ଆଲୋଡ଼ିତ କରୁଥିବ ବୋଲି ମତ ଦେଇଥିଲେ। ସମ୍ମାନିତ ବକ୍ତା କଥାକାର ପବିତ୍ର ପାଣିଗ୍ରାହୀ ସମୟ ସୁଅରେ ଓଡ଼ିଆ ସାହିତ୍ୟର ପ୍ରଥମ କ୍ଷୁଦ୍ରଗଳ୍ପ ରେବତୀ କିପରି ପରବର୍ତ୍ତୀ ସମୟର ଗାଳ୍ପିକମାନଙ୍କୁ ଭିନ୍ନ ଭିନ୍ନ ବାଟରେ ରେବତୀ ଚରିତ୍ରକୁ ଉପସ୍ଥାନ କରିବାକୁ ପ୍ରେରଣା ଯୋଗାଇବା ସହିତ ସମୟର ନିଚ୍ଛକ ଚିତ୍ରକୁ ତୋଳି ଧରି ରେବତୀମାନଙ୍କୁ ଉତ୍ତରିତ ଚେତନାରେ ରୁପାନ୍ତରିତ କରିଛି ସେ ସମ୍ପର୍କରେ ଆକର୍ଷଣୀୟ ବକ୍ତବ୍ୟ ରଖିଥିଲେ। ସଭାପତି ଡ଼ା ଦାସ ତାଙ୍କ ଅଭିଭାଷଣରେ ଫକୀରମୋହନଙ୍କ ଉପନ୍ୟାସ ଉପରେ ସମ୍ୟକ ଆଲୋକପାତ କରିଥିଲେ। ଶେଷରେ କବି ମନୋରଂଜନ ଦାସ ଧନ୍ୟବାଦ ଅର୍ପଣ କରିଥିଲେ। ଅନ୍ୟ ମାନଙ୍କ ମଧ୍ୟରେ ବରିଷ୍ଠ ଅଧିବକ୍ତା ରାଖାଲ ଚନ୍ଦ୍ର ଦାସ, ଗାଳ୍ପିକ ରାଧା ବିନୋଦ ନାୟକ, ଡ଼ ପ୍ରଭାତ ନଳିନୀ ମହାପାତ୍ର, ଡ଼ ଝରଣା ପଟ୍ଟନାୟକ, ସାହିତ୍ୟ ଏକାଡ଼େମି ସଦସ୍ୟ ପୁର୍ଣ୍ଣଚନ୍ଦ୍ର ବହଳି, ଅଶୋକ ଜେନା, ଡ଼ ପଦ୍ମକାନ୍ତ ଧଳ, ଶିବଚରଣ ଖାମୁରାଇ, ପ୍ରାଧ୍ୟାପକ ଭରତ ଚନ୍ଦ୍ର ସାହୁ ପ୍ରମୁଖ ଭଦ୍ରକର ବହୁ ବୁଦ୍ଧିଜିବୀ ଏହି ନିଆରା ସାରସ୍ୱତ ସଭାରେ ଯୋଗ ଦେଇଥିଲେ।

Leave a Reply

Your email address will not be published. Required fields are marked *