ଜିଲ୍ଲା ପରିକ୍ରମା

ପ୍ରଧାନମନ୍ତ୍ରୀ ଆବାସ ଯୋଜନା ଅର୍ଥ ହେରଫେର ଅଭିଯୋଗ

ବୌଦ୍ଧ, ୧୭ା୦୭(ଓଡ଼ିଆ ପୁଅ ସଜ୍ଜନ କୁମାର ଅଗ୍ରୱାଲା); ପ୍ରଧାନମନ୍ତ୍ରୀ ଆବାସ ଯୋଜନା ରେ ଗୃହ ନିର୍ମାଣ ପାଇଁ କାର୍ଯ୍ୟାଦେଶ ପାଇଥିବା ଜନୈକ ହିତାଧିକାରୀ ସ୍ଥାନୀୟ ଜିଓଟେକ ଓ ପିଇଓ ଙ୍କୁ ହାତ କରି ଅନ୍ୟର ଘର ଡିହ ଉପରେ ନିର୍ମିତ ଏକ ପକ୍କା ଗୃହକୁ ଦେଖାଇ ଅନୁଦାନ ଅର୍ଥ ହଡପ କରିବା ଭଳି ଏକ ଚାଂଚଲ୍ୟକର ଅଭିଯୋଗ ଆଣିଛନ୍ତି ଖୋଦ ହିତାଧିକାରୀଙ୍କ ଜ୍ୱାଇଁ। ଜ୍ୱାଇଁ ନିଜ ଶଶୁରଙ୍କ ନାଁରେ ବିଡିଓ ଙ୍କ ସମେତ ବୌଦ୍ଧ ଭିଜିଲାନ୍ସ କର୍ତୁପକ୍ଷଙ୍କ ନିକଟରେ ଅଭିଯୋଗ ଆଣି ଏହାର ତଦନ୍ତ ଦାବି କରିବା ଭଳି ଘଟଣା ପଦାକୁ ଆସିବା ପରେ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକରେ ଏହା ମୁଖ୍ୟ ଚର୍ଚ୍ଚାର ବିଷୟ ହୋଇଛି। ପ୍ରାପ୍ତ ଅଭିଯୋଗ ମତେ ହରଭଙ୍ଗା ବ୍ଲକ ଲୁଣିବାହାଲ ପଂଚାୟତ ଅନ୍ତର୍ଗତ ଯୁବରାଜପୁର ଗ୍ରାମର ସୁରେନ୍ଦ୍ର ନାଏକ ୨୦୧୬-୧୭ ଆର୍ଥିକ ବର୍ଷ ପାଇଁ ପ୍ରଧାନ ମନ୍ତ୍ରୀ ଆବାସ ଯୋଜନା ରେ ଏକ ପକ୍କାଗୃହ କରିବା ସକାଶେ ବ୍ଲକ କାର୍ଯ୍ୟଳୟରୁ କାର୍ଯ୍ୟାଦେଶ ପାଇଥିଲେ। ମାତ୍ର ସେ ଆଜକୁ ପ୍ରାୟ ୧୦ ବର୍ଷ ପୁର୍ବରୁ ତାଙ୍କର ଚତୁର୍ଥ ଝିଅ ବିଭାଘର ତୁଲାଇବା ପାଇଁ ସେ ନିଜର ସମସ୍ତ ପୈତୃକ ଘରଡିହ ଓ ଜମିବାଡି ଅନ୍ୟଠି ବିକ୍ରି କରିଦେଇଥିବାରୁ ଘର ନିର୍ମାଣ ନକରି ସ୍ଥାନୀୟ ଜିଓଟେକ ଓ ପଂଚାୟତ ନିର୍ବାହୀ ଅଧିକାରୀଙ୍କ ସହିତ ସଲାସୁତରା କରି ସେହି ଗ୍ରାମର କୁବେର ନାଏକଙ୍କ ଘରଡିହରେ ନିର୍ମିତ ଏକ ପକ୍କାଘରକୁ ଦେଖାଇ ଚାରୋଟି କିସ୍ତିରେ ଅର୍ଥ ଉଠାଇ ନେଇଥିବା ଅଭିଯୋଗ ପତ୍ରରେ ଦର୍ଶାଯାଇଛି। ଅଭିଯୋଗକାରୀ ଶ୍ରୀ ନାଏକଙ୍କର ଜ୍ୱାଇଁ ତଥା ତିଲେଶ୍ୱର ଗ୍ରାମର ଦୋଳଗୋବିନ୍ଦ ପ୍ରଧାନ ବ୍ଲକ କାର୍ଯ୍ୟାଳୟକୁ ଯାଇ ବିଡିଓଙ୍କ ଅନୁପସ୍ଥିତରେ ମୁଖ୍ୟ କିରାଣିଙ୍କୁ ଅଭିଯୋଗ ପ୍ରଦାନ କରିଥିବା ଜଣାପଡିଛି। ଏନେଇ ସଂପୃକ୍ତ ଲୁଣିବାହାଲ ପଂଚାୟତ ନିର୍ବାହି ଅଧିକାରୀ ସନ୍ତୋଷ କୁମାର ରଣାଙ୍କୁ ପଚାରାଯିବାରୁ ସେ ସୁରେନ୍ଦ୍ର ନାଏକ ନିଜର ଘରଡିହରେ ଗୃହ ନିର୍ମାଣ କରିଛନ୍ତି। ତେଣୁ ଏଭଳି ଅଭିଯୋଗ ଉଦ୍ଦେଶ୍ୟ ମୂଳକ ଭାବେ କେହି କରିଥାଇ ପାରନ୍ତି ବୋଲି ଓଲଟି କହିଥିଲେ। ଏହାର ସତ୍ୟାସତ୍ୟ ତଦନ୍ତ କରି ଦୃଷ୍ଟାନ୍ତ ମୂଳକ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ଅଭିଯୋଗକାରୀ ଶ୍ରୀ ପ୍ରଧାନ ଦାବି କରିଛନ୍ତି।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

To Top