ପବିତ୍ର ମକର ସଂକ୍ରାନ୍ତିରେ ହିଙ୍ଗୁଳା ପୀଠରେ ଶ୍ରଦ୍ଧାଳୁଙ୍କ ଭିଡ଼

ତାଳଚେର, ୧୪/୧(ଓଡ଼ିଆ ପୁଅ/ଅଜିତ କୁମାର ବେହେରା): ପବିତ୍ର ମକର ସଂକ୍ରାନ୍ତି ଉପଲକ୍ଷେ ତାଳଚେର ବ୍ଲକର ଗୋପାଳପ୍ରସାଦସ୍ଥିତ ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳାଙ୍କ ପୀଠରେ ବହୁ ଶ୍ରଦ୍ଧାଳୁଙ୍କ ସମାଗମ ପରିଲକ୍ଷିତ ହୋଇଥିଲା। ଏହି ପବିତ୍ର ଦିବସ ଅବସରରେ ମା’ଙ୍କ ଦର୍ଶନ କରି ତାଙ୍କ କୃପା ଲାଭ କରିବା ନିମନ୍ତେ ରବିବାର ପ୍ରତ୍ୟୁଷରୁ ବହୁ ସଂଖ୍ୟାରେ ଶ୍ରଦ୍ଧାଳୁ ଏକାଠି ହୋଇଥିଲେ। ଭକ୍ତମାନେ ଧାଡି ବାନ୍ଧି ଶୃଙ୍ଖଳାର ସହ ମା’ଙ୍କର ଏହି ଦୁର୍ଲ୍ଲଭ ଦର୍ଶନ କରିଥିଲେ। ଭକ୍ତମାନଙ୍କ ହରିବୋଲ, ହୁଳହୁଳି ଶବ୍ଦରେ ସମଗ୍ର ଅଂଚଳରେ ଏକ ଆଧ୍ୟାତ୍ମିକ ବାତାବରଣ ସୃଷ୍ଟି ହୋଇଥିଲା। ଏହି ଉପଲକ୍ଷେ ମା’ଙ୍କ ପୀଠରେ ଏକ ଯଜ୍ଞର ଆୟୋଜନ କରାଯାଇଥିଲା। ଭକ୍ତମାନଙ୍କ ନିମନ୍ତେ ମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ଭୋଗ ବଣ୍ଟନ କରାଯାଇଥିଲା। ସୂଚନାଯୋଗ୍ୟ ମକର ସଂକ୍ରାନ୍ତିଠାରୁ ସୂର୍ଯ୍ୟଙ୍କର ଉତରାୟଣ ଗତି ହୋଇଥାଏ। ଏହିଦିନ ଠାରୁ ଦିନ କ୍ରମଶଃ ବୃଦ୍ଧି ହୋଇଥାଏ ଏବଂ ରାତ୍ରୀର ଅବଧି ହ୍ରାସ ହୋଇଥାଏ। ଏହିଦିନ କୌଣସି ତୀର୍ଥସ୍ଥାନରେ ଥିବା ଦେବାଳୟ କିମ୍ବା ଶୈବାଳୟ ନିକଟସ୍ଥ ପୁଷ୍କରଣୀ, ନଦୀ, ଜଳାଧାର ଇତ୍ୟାଦିରେ ସ୍ନାନ କରି ଦାନ କଲେ ଅକ୍ଷୟ ପୁଣ୍ୟ ପ୍ରାପ୍ତି ହୋଇଥାଏ ବୋଲି ବିଭିନ୍ନ ପୁରାଣ ଶାସ୍ତ୍ରରେ ଉଲ୍ଲେଖ ଅଛି। ତେଣୁ ସମଗ୍ର ଭାରତବର୍ଷରେ ଆଜିର ଦିନକୁ ଗଣ ପର୍ବ ଭାବରେ ପାଳନ କରାଯାଇଥାଏ। ଦାକ୍ଷିଣାତ୍ୟରେ ଏହାକୁ ପୋଙ୍ଗଲ, ହିମାଚଳପ୍ରଦେଶ, ପଞ୍ଜାବ, ହରିଆଣାରେ ଲୋହଡି, ଆସାମରେ ବିହୁ, ଉତରପ୍ରଦେଶ, ବିହାରରେ ଖିଚଡି, ଓଡିଶାର କୁଡୁମି ସଂପ୍ରଦାୟର ଲୋକ ଏହାକୁ ଟୁସୁ ପର୍ବ ଭାବରେ ପାଳନ କରିଥାନ୍ତି। ଏତଦ୍ ବ୍ୟତୀତ ତାଳଚେର ବ୍ଲକର ସୋଲଡାଗ୍ରାମସ୍ଥିତ ବାବା ବାଲୁଙ୍କେଶ୍ୱର ଶିବ ମନ୍ଦିର, ପଶ୍ଚିମେଶ୍ୱର, ନତଡା, ଡଅଁରା, କୁମୁଣ୍ଡା, ସାଉଥବଲଣ୍ଡା ପ୍ରଭୃତି ଅଂଚଳଗୁଡିକରେ ଥିବା ଶୈବପୀଠ ଗୁଡିକରେ ମଧ୍ୟ ଭକ୍ତମାନଙ୍କର ଭିଡ ଲାଗି ରହିଥିବାର ଦେଖିବାକୁ ମିଳିଛି।

Leave a Reply

Your email address will not be published. Required fields are marked *