ପକ୍ଷୀଜ୍ୱର ସଂକ୍ରମଣମୁକ୍ତ ହେଲା ଭାରତ : ପ୍ରତିଷେଧକ ବ୍ୟବସ୍ଥା ସ୍ୱରୂପ ବ୍ଲାର୍ଡ ଫ୍ଲୁ ଆଶଙ୍କା ଥିବା ଅଂଚଳରେ ସତର୍କ ଦୃଷ୍ଟି ରଖିବାକୁ କେନ୍ଦ୍ରର ପରାମର୍ଶ

ନୂଆ ଦିଲ୍ଲୀ ୬-୭ (ଓଡ଼ିଆ ପୁଅ) ସମଗ୍ର ଦେଶକୁ ଜୁନ୍ ୫ ତାରିଖରୁ ବାର୍ଡ ଫ୍ଲୁ ବା ପକ୍ଷୀଜ୍ୱର ମୁକ୍ତ ଘୋଷଣା କରାଯାଇଛି। ଏହି ମର୍ମରେ ୫ ଜୁନ୍ ୨୦୧୮ରେ କେନ୍ଦ୍ର ସରକାରଙ୍କ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଅଧୀନସ୍ଥ ପଶୁପାଳନ, ଦୁଗ୍ଧ ଉନ୍ନୟନ ଓ ମତ୍ସ୍ୟ ବିଭାଗ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି।

ଏଭଳି ଘୋଷଣା ସତ୍ୱେ, ରାଜ୍ୟ ସରକାରମାନେ ନିଜ ନିଜ ଅଂଚଳରେ ସତର୍କ ଦୃଷ୍ଟି ରଖିବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି। ବିଶେଷକରି ପକ୍ଷୀଜ୍ୱର ସଂକ୍ରମଣ ଆରମ୍ଭ ହେଉଥିବା ଅଂଚଳ, ବନାଂଚଳ, ପକ୍ଷୀ ଅଭୟାରଣ୍ୟ ଆଦି ସ୍ଥାନ ଉପରେ ତୀକ୍ଷ୍ଣ ଦୃଷ୍ଟି ରଖିôବାକୁ ପଶୁପାଳନ, ଦୁଗ୍ଧ ଉନ୍ନୟନ ଓ ମତ୍ସ୍ୟ ବିଭାଗଗୁଡ଼ିକୁ ପରାମର୍ଶ ଦିଆଯାଇଛି। କେନ୍ଦ୍ର ସରକାରଙ୍କ ପକ୍ଷରୁ ଏଥିନେଇ ସବୁ ରାଜ୍ୟ ଓ କେନ୍ଦ୍ରଶାସିତ ଅଂଚଳର ମୁଖ୍ୟ ସଚିବମାନଙ୍କୁ ଚିଠି ଲେଖାଯାଇଛି।

ଓଡ଼ିଶାର ପାରାଦୀପ ନିକଟସ୍ଥ ଷଣ୍ଢକୁଦ ଓ ବଡ଼ପଡ଼ିଆ ଅଂଚଳ ଉପରେ ମଧ୍ୟ ସତର୍କ ଦୃଷ୍ଟି ରଖିବାକୁ ସଂପୃକ୍ତ ବିଭାଗକୁ କେନ୍ଦ୍ର ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି। କେନ୍ଦ୍ର ସରକାରଙ୍କ କାର୍ଯ୍ୟାନ୍ୱୟନ ଯୋଜନାର ମାର୍ଗଦର୍ଶିକା ଅନୁସାରେ ପକ୍ଷୀଜ୍ୱର ସଂକ୍ରମଣ ବ୍ୟାପୁଥିବା ଅଂଚଳର ୧ କିଲୋମିଟର ପରିଧି ମଧ୍ୟରେ କୁକୁଡ଼ା, ଅନ୍ୟାନ୍ୟ ଗୃହପାଳିତ ପକ୍ଷୀ, ଅଣ୍ଡା, ପକ୍ଷୀ ଖାଦ୍ୟ, ପକ୍ଷୀ ମଳ ଓ ଅନ୍ୟାନ୍ୟ ସଂକ୍ରମିତ ସାମଗ୍ରୀକୁ ନଷ୍ଟ କରିବା ଲାଗି ତ୍ୱରିତ ପଦକ୍ଷେପମାନ ଗ୍ରହଣ କରାଯାଉଛି। ସଂକ୍ରମିତ ଅଂଚଳକୁ ବିଭିନ୍ନ ପ୍ରକାର ସଂକ୍ରମଣ ନିରୋଧି ବ୍ୟବସ୍ଥା ଜରିଆରେ ସଂକ୍ରମଣମୁକ୍ତ କରାଯାଉଛି। ଏଥିସହ ପକ୍ଷୀ ରହୁଥିବା ଅଂଚଳ ଉପରେ ଅହରହ ବିଭାଗୀୟ କର୍ମଚାରୀଙ୍କ ପକ୍ଷରୁ ଦୃଷ୍ଟି ରଖାଯାଉଛି ବୋଲି ସରକାରୀଭାବେ ସୂଚନା ଦିଆଯାଇଛି।

Leave a Reply

Your email address will not be published. Required fields are marked *