ଗାତରେ ପଡିଲା ହାତୀ, ମୁକୁଳାଇବାକୁ ଉଦ୍ୟମ କରି ହାତୀ ଆକ୍ରମଣରେ ବନପାଳ ଗୁରୁତର

କେନ୍ଦୁଝର, ୮ା୯(ଓଡିଆ ପୁଅ/ପ୍ରଦୀପ ମହାନ୍ତି):ଏକ ହାତୀ ପଲ ଜଙ୍ଗଲରେ ବୁଲୁଥିବା ସମୟେ ପୂର୍ବରୁ ଖୋଳାଯାଇଥିବା ଏକ କୂଅରେ ଦୁଇଟି ହାତୀପଡି ଦୀର୍ଘ ସମୟ ପରେ ଉଦ୍ଧାର ହେବା ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଥିବା ଜଣେ ବନପାଳ ବା ଫରେଷ୍ଟର ଏହି ହାତୀ ଆକ୍ରମଣରେ ଗୁରୁତର ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହେବା ଘଟଣା ସମଗ୍ର ଜିଲ୍ଲାରେ ଆଲୋଡନ ଖେଳାଇ ଦେଇଛି। ଗୁରୁତର ବନପାଳଙ୍କ ସ୍ୱାସ୍ଥ୍ୟ ଅବସ୍ଥା ଗମ୍ଭିର ଥିବାବେଳେ କେନ୍ଦୁଝର ହାତୀ କରିଡର ପ୍ରତିଷ୍ଠା ନହେଲେ ଗଜରାଜ ଓ ମଣିଷଙ୍କ ମଧ୍ୟରେ ମୁହାଁ ମୁହିଁ ହେବା ଘଟଣା ବୃଦ୍ଧି ପାଇବାର ଆଶଙ୍କା ଦେଖାଦେଇଛି। ଘଟଣାରୁ ପ୍ରକାଶ ଯେ, କେନ୍ଦୁଝର ଜିଲ୍ଲା ବାଂଶପାଳ ବ୍ଲକ କାଦକଳା ଗ୍ରାମପଞ୍ଚାୟତର ସିଂପୁରଠାରେ ଖାଲରେ ପଡିଥିବା ହାତୀକୁ ଉଦ୍ଧାର କରିବାକୁ ଯାଇଥିବାବେଳେ ହାତୀ ଆକ୍ରମଣରେ ଜଣେ ଫରେଷ୍ଟର ଗୁରୁତର ଆହତ ହୋଇ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧିନ ଥିବା ଜଣାପଡିଛି। ଶୁକ୍ରବାର ରାତିରେ ଭୂୟାଁଜୁଆଙ୍ଗ ପୀଢ ରେଞ୍ଜ ଅନ୍ତର୍ଗତ ସିଂପୁର ଅଞ୍ଚଳରେ ୧୬ଟି ଛୋଟ ବଡ ହାତୀ ସେ ଅଞ୍ଚଳର ଧାନ ଫସଲ ନଷ୍ଟ କରୁଥିବା ସ୍ଥାନୀୟ ଲୋକେ ବନ ବିଭାଗକୁ ଖବର ଦେଇଥିଲେ। ଖବର ପାଇ ବନ ବିଭାଗର କର୍ମଚାରୀମାନେ ଶୁକ୍ରବାର ରାତିରେ ଘଟଣା ସ୍ଥଳକୁ ଯାଇ ହାତୀଗୁଡିକୁ ନିକଟସ୍ଥ ଜଙ୍ଗଲ ମଧ୍ୟକୁ ଘଉଡାଇ ଦେଇଥିଲେ। ରାତି ୨ଟାରେ ବନ କର୍ମଚାରୀମାନେ ରେଞ୍ଜ ଅଫିସକୁ ଫେରିଥିବାବେଳେ ପୁନର୍ବାର ରାତି ୪ଟାରେ ୨ଟି ଦନ୍ତାହାତୀ ବିଲ ମଧ୍ୟରେ ଥିବା ଗୋଟିଏ କୂଅ ମଧ୍ୟରେ ପଡିଥିବା ଖବର ପାଇ ପୁଣି ଘଟଣାସ୍ଥଳକୁ ଯାଇଥିଲେ।ଖବର ପାଇ ଶୁଆକାଟୀ ଫରେଷ୍ଟର ଟିକେଶ୍ୱର ମହାନ୍ତଙ୍କ ନେତୃତ୍ୱରେ ବନବିଭାଗ ଏକ ଟିମ ସେଠାକୁ ଯାଇଥିବାବେଳେ ଦମକଳ ବାହିନୀ ସେଠାରେ ପହଁଚି ହାତୀ ଦୁଇଟିକୁ ଖାତରୁ ଉଦ୍ଧାର କରିବା ପାଇଁ ସମସ୍ତେ ନାକେଦମ ହୋଇଥିଲେ। ଗୋଟିଏ ଦନ୍ତାହାତୀ ଖାତରୁ ଉପରକୁ ଉଠିବାକୁ ସକ୍ଷମ ହୋଇଥିବାବେଳେ ଅନ୍ୟ ଦନ୍ତା ହାତୀଟିକୁ ବହୁ କଷ୍ଟରେ ସେଠାରୁ ଉଦ୍ଧାର ହୋଇ ଉଠି ଯାଉଥିବା ସମୟରେ ଉପସ୍ଥିତ ଥିବା ଲୋକ ଏବଂ ବନ କର୍ମଚାରୀମାନେ ମଧ୍ୟ ଧାଇଁଥିଲେ। ଧାଇଁବା ସମୟରେ ଫରେଷ୍ଟର ଟିକେଶ୍ୱର ମହାନ୍ତ କାଦୁଅରେ ଗୋଡ ଖସିଯିବାରୁ ପଡିଯାଇଥିଲେ। ହାତୀଟି ତାଙ୍କ ପିଠି ଉପରେ ମାଡି ଦେଇ ଚାଲି ଯାଇଥିଲା। ଅପରପକ୍ଷରୁ ଲୋକମାନେ ହାତୀଟିକୁ ଘଉଡାଇଦେବାରୁ ହାତୀଟି ଫେରି କାଦୁଅରେ ପଡିଥିବା ଫରେଷ୍ଟର ଟିକେଶ୍ୱର ମହାନ୍ତ ଉପରେ ପୁଣି ମାଡି ଯାଇ ଚାଲିଯାଇଥିଲା। ଫଳରେ ସେ ଗୁରୁତର ଆହତ ହୋଇଥିଲେ। ବନ ବିଭାଗ କର୍ମଚାରୀ ତାଙ୍କୁ ଉଦ୍ଧାର କରି ତାଙ୍କୁ ତୁରନ୍ତ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଫରେଷ୍ଟରଙ୍କ ଅବସ୍ଥା ଗୁରୁତର ଥିବାବେଳେ ତାଙ୍କର ସମସ୍ତ ଚିକିତ୍ସା ପାଇଁ ବ୍ୟବସ୍ଥା କରାଯାଉଥିବା ଜଣାପଡିଛି। ଖବର ପାଇ କେନ୍ଦୁଝର ଡିଏଫଓ ସନ୍ତୋଷ ଯୋଶୀ, ଏସିଏଫ ମନୋରଞ୍ଜନ ମିଶ୍ର, ବିଜେପି ରେଞ୍ଜର ମୁକ୍ତିକାନ୍ତ ପରିଡା ଏବଂ ଅନ୍ୟାନ୍ୟ ବନ କର୍ମଚାରୀମାନେ ଡାକ୍ତରଖାନାରେ ଉପସ୍ଥିତ ରହି ଚିକିତ୍ସା ବ୍ୟବସ୍ଥା ତଦାରଖ କରିଥିଲେ। ସେପଟେ ହାତୀ ଗୁଡିକ ସିଂପୁର ନିକଟସ୍ଥ ଜଙ୍ଗଲରେ ପଳାଇ ଯାଇଥିବା ସୂଚନା ମିଳିଥିବାବେଳେ ରାତିରେ ଚାଷ ଜମି ଓ ଜନ ବସତି ଆଡକୁ ଆସିବା ସନ୍ଦେହ କରି ଉକ୍ତ ଅଞ୍ଚଳର ଜନସାଧାରଣ ଆତଙ୍କିତ ହୋଇପଡିଛନ୍ତି।

Leave a Reply

Your email address will not be published. Required fields are marked *