କେନ୍ଦ୍ରାପଡା କଲେଜର ବାର୍ଷିକ ଉତ୍ସବ  

କେନ୍ଦ୍ରାପଡା ୧୮/୨(ଓଡିଆପୁଅ/ଚିତ୍ତରଞ୍ଜନ ଦାସ )- କେନ୍ଦ୍ରାପଡା ସ୍ୱୟଂଶାସିତ ମହାବିଦ୍ୟାଳୟର +୩ ଛାତ୍ର ସଂସଦର ଦ୍ୱିତୀୟ ଦିବସର ବାର୍ଷିକ ଉତ୍ସବ ମହାବିଦ୍ୟାଳୟ ପରିସରରେ ଶୁକ୍ରବାର ଅନୁଷ୍ଠିତ ହୋଇଯାଇଛି । ଛାତ୍ର ସଂସଦର ସଭାପତି ଚିତ୍ତରଂଜନ ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉତ୍ସବରେ ରାଜ୍ୟ ଅର୍ଥର୍ ଓ ଅବକାରୀ ବିଭାଗ ମନ୍ତ୍ରୀ ଶଶିଭୂଷଣ ବେହେରା ମୁଖ୍ୟ ଅତିଥିଭାବେ ଯୋଗଦେଇ ପ୍ରଦୀପ ପ୍ରଜ୍ୱଳନ ପୂର୍ବକ ଉତ୍ସବକୁ ଉଦ୍ଘାଟନ କରି କହିଥିଲେ ଯେ କେନ୍ଦ୍ରାପଡାର ଏକ ବିଶେଷ ପରିଚୟ ରହିଛି ସାରା ଭାରତ ବର୍ଷରେ । ଦିଲ୍ଲୀ ଦରବାରରେ ପ୍ରବାଦ ପୁରୁଷ ବିଜୁ ପଟ୍ଟନାୟକ ଓ ଅନ୍ୟଜଣେ ରବି ରାୟ କେନ୍ଦ୍ରାପଡାରୁ ପ୍ରତିନିଧିତ୍ୱ କରି ଲୋକସଭାରେ ବାଚସ୍ପତି ଭାବେ କାର୍ଯ୍ୟ ସଂପାଦାନ କରି କେନ୍ଦ୍ରାପଡାର ମାଟିକୁ ଗୈାରବାନ୍ୱିତ କରିଥିଲେ । ରାଜନୈତିକ ଚିନ୍ତାଧାରା ଓ ଦର୍ଶନରେ କେନ୍ଦ୍ରାପଡା ତା’ର ସ୍ୱତନ୍ତ୍ରତା ପ୍ରତିପାଦନ କରିଆସିଛି । ଜାତି, ଧର୍ମ, ବର୍ଣ୍ଣ ନିର୍ବର୍ିଶେଷରେ ଦେଶର ଗଣତନ୍ତ୍ର ଓ ସମ୍ବିଧାନକୁ ବଂଚାଇ ରଖିବା ପାଇଁ ଆଜିର ଯୁବ ସମାଜ ସଂକଳ୍ପ ବଦ୍ଧ ହେବା ଆବଶ୍ୟକ ବୋଲି ମୁଖ୍ୟ ଅତିଥି ଶ୍ରୀ ବେହେରା ମତବ୍ୟକ୍ତ କରିଥିଲେ । ଉତ୍ସବରେ ଦୈନିକ ସମ୍ବାଦର ସଂପାଦକ ସୈାମ୍ୟରଂଜନ ପଟ୍ଟନାୟକ ମୁଖ୍ୟବକ୍ତାଭାବେ ଯୋଗଦେଇ ନିଶା ନିବାରଣ ପାଇଁ ଛାତ୍ରଛାତ୍ରୀ ମାନଙ୍କୁ ଆହ୍ୱାନ ଦେଇଥିଲେ । ଆଜି ବିକାଶ ନାମରେ ଅତିମାତ୍ରାରେ ଗଛ ଗୁଡିକୁ କାଟି ଯେଉଁ ଭଳି ବିନାଶକୁ ଆମନ୍ତ୍ରଣ କରାଯାଉଛି ତାହାର ପରିବର୍ତ୍ତନ ହେବା ଆବଶ୍ୟକ ବୋଲି ମୁଖ୍ୟବକ୍ତା ବକ୍ତବ୍ୟ ରଖିଥିଲେ । ଗଛ କାଟିବା ଦ୍ୱାରା ପୃଥିବୀ ପକ୍ଷରୁ ଧୀରେ ଧୀରେ ଅମ୍ଲଜାନ ସରି ସରି ଆସୁଥିବାରୁ ମାନବ ସତ୍ତା ଲୋପ ପାଇବାର ସମୟ ନିକଟତର ହେଉଛି ବୋଲି ସେ କହିଥିଲେ । ଯୁବ ବର୍ଗମାନେ ରକ୍ତ ଦାନ ଓ ଭୋଟ୍ ଦେଇ ଗଣତନ୍ତ୍ରକୁ ସୁଦୁଢ କରିବା ପାଇଁ ଶ୍ରୀ ପଟ୍ଟନାୟକ ଆହ୍ୱାନ ଦେଇଥିଲେ ।  ଅଧ୍ୟକ୍ଷା ଡଃ. ସଂଯୁକ୍ତା ଦାସ ସ୍ୱାଗତ ଭାଷଣ ପ୍ରଦାନ କରିଥିବାବେଳେ ଛାତ୍ର ସଂସଦର ଉପଦେଷ୍ଟା ଅଧ୍ୟାପକ ଗୁରୁ ପ୍ରସାଦ ମହାନ୍ତି ଅତିଥି ପରିଚୟ ପ୍ରଦାନ ଓ ଅଧ୍ୟାପକ ରାମଚନ୍ଦ୍ର ପାତ୍ର ଧନ୍ୟବାଦ ଅର୍ପଣ କରିଥିଲେ । ଛାତ୍ର ସଂସଦର ଉପସଭାପତି ମୃତ୍ୟୁଞ୍ଜୟ ବେହେରା କଲେଜରେ ଏକ ଅଡିଟୋରିୟମ୍ ଓ ବାଳକ ଛାତ୍ରାବାସ ନିର୍ମାଣ ପାଇଁ ମୁଖ୍ୟ ଅତିଥିଙ୍କ ନିକଟରେ ଦାବି ଉପସ୍ଥାପନ କରୁଥିବା ସମୟରେ ମୁଖ୍ୟ ଅତିଥି ସଭାମଂଚ ଛାଡି ଚାଲିଯାଇଥିଲେ । ଏହି ଉତ୍ସବରେ କଲେଜ ଉପାଧ୍ୟକ୍ଷ ପ୍ରାଧ୍ୟାପକ ବିନ୍ଦୁମିତ୍ର ବଳ, କଲେଜ ପରିଚାଳନା କମିଟି ସଭାପତି ବିଧାୟକ କିଶୋର ଚନ୍ଦ୍ର ତରାଇ, ଜିଲ୍ଲା ପରିଷଦ ସଭାପତି ମାନସ କୁମାର ପରିଡା, ଅଧ୍ୟାପକ ତପନ କୁମାର ପତି, ଡଃ. ଜ୍ଞାନିନ୍ଦ୍ର ଦାସ, ରଂଜିତ ଦାସ, ଡଃ. ଶ୍ରୀଧର ସାମଲ, ଡଃ. ରାଜେନ୍ଦ୍ର ପ୍ରସାଦ ତ୍ରିପାଠୀ, ଅଧ୍ୟାପିକା ସାୟନ୍ତିନି ବେହେରା, କେନ୍ଦ୍ରାପଡା ବ୍ଲକ ଅଧ୍ୟକ୍ଷ ଅନାମ ବଂଧୁ ଧଳ, କେନ୍ଦ୍ରାପଡା ବ୍ଲକ ବିଜେଡି ସଭାପତି ଆଲୋକ ସାହୁ ପ୍ରମୁଖ ଉପସ୍ଥିତ ଥିଲେ । ଶେଷରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।

Leave a Reply

Your email address will not be published. Required fields are marked *