କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମାଁ ମାଣିକେଶ୍ୱରୀଙ୍କ ପ୍ରସିଦ୍ଧ ଛତର ଯାତ୍ରା ସମ୍ପନ୍ନ

କଳାହାଣ୍ଡି ୨-୧୦ (ଓଡିଆ ପୁଅ/ଦୁଷ୍ମନ୍ତ କୁମାର ପଣ୍ଡା) କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମାଁ ମାଣିକେଶ୍ୱରୀଙ୍କ ପ୍ରସିଦ୍ଧ ଛତର ବିଜୟ ଯାତ୍ରା ପବିତ୍ର ମହାନବମୀ ଗୁରବାର ପ୍ରାତଃ କାଳରେ ଭକ୍ତମାନଙ୍କ ପ୍ରବଳ ଉତ୍ସାହ ଉଦ୍ଦୀପନାରେ ଶାନ୍ତି ଶୃଙ୍ଖଳାର ସହ ପାଳିତ ହୋଇଯାଇଛି। ଭବାନୀପାଟଣା ସହରର ପଶ୍ଚିମ ଦିଗରେ ଥିବା ଜେନାଖାଲ ଠାରୁ ଆରଇଓ କଲୋନୀ ଦେଇ ଜାତୀୟ ରାଜପଥ ଘୋଡାଘାଟ ଛକ ଜଗନ୍ନାଥ ମନ୍ଦିର ରାସ୍ତା ଦେଇ ମାଣିକେଶ୍ୱରୀ ମନ୍ଦିର ପର୍ଯ୍ୟନ୍ତ ପ୍ରାୟ ୪ କି.ମି. ରାସ୍ତା ର ଉଭୟ ପାଶ୍ୱର୍ରେ ଏବଂ ସେଗୁଡିକୁ ସଂଯୋଗ କରୁଥିବା ରାସ୍ତା ମାନଙ୍କରେ ଅଗଣିତ ଭକ୍ତ ମାଁ ମାଣିକେଶ୍ୱରୀଙ୍କ ଚଳନ୍ତି ସ୍ୱରୂପ ଛତରକୁ ଦର୍ଶନ କରିବା ପାଇଁ ଉପସ୍ଥିତ ହୋଇ ଶାନ୍ତି ଶୃଙ୍ଖଳାର ସହ ମାଁଙ୍କୁ ଭକ୍ତି ନିବେଦନ ସହ ଦର୍ଶନ କରିଥିଲେ। ମାନ୍ୟବର ସୁପ୍ରିମ କୋର୍ଟ ଓ ହାଇକୋର୍ଟ ଙ୍କ ପଶୁହତ୍ୟା ନିଷେଧ ପାଇଁ କଡା ନିଦେ୍ର୍ଦଶ ଏବଂ ଜିଲ୍ଲା ପ୍ରଶାସନ ତରଫରୁ ଅନେକ ବାର ସଚେତନତା କାର୍ଯ୍ୟକ୍ରମ କରାଯିବା ସତ୍ୱେ ଭକ୍ତମାନେ ନିଜ ନିଜ ମାନସିକ ଅନୁସାରେ ମାଁଙ୍କ ଚରଣରେ ବୋଦା ପଶୁ ପକ୍ଷୀ ବଳି ପକାଇଥିଲେ। ହଜାର ହଜାର ବଳିରେ ଜେନାଖାଲ ଠାରୁ ମାଣିକେଶ୍ୱରୀ ମନ୍ଦିର ରାସ୍ତା ରକ୍ତ ରଞ୍ଜିତ ଦେଖାଯାଇଥିଲା।

ବିଧି ଅନୁସାରେ ଦଶହରା ମାସ ମୂଳାଷ୍ଟମୀ ଠାରୁ ମାଁ ମାଣିକେଶ୍ୱରୀଙ୍କ ଶାରଦୀୟ ପୂଜା ଆରମ୍ଭ ହୋଇଥାଏ। ମାଁ ମାଣିକେଶ୍ୱରୀ ଛିନ୍ନମସ୍ତା ରୂପେ ପୂଜା ପାଆନ୍ତି ଏବଂ ଭକ୍ତଙ୍କ ପ୍ରାର୍ଥନା ଓ ସମର୍ପଣ ଅନୁସାରେ ଆଶୀର୍ବାଦ କରୁଥିବା ବିଶ୍ୱାସ ରହିଛି। ଦଶହରା ଆରମ୍ଭରେ ପ୍ରଥମେ ମୂଳାଷ୍ଟମୀ ତିଥୀରେ ଲଗ୍ନ ଅନୁସାରେ ବିଧିମତେ ପୂଜାର୍ଚ୍ଚନା କରାଯାଇ ମାଁଙ୍କ ପ୍ରତିମାରେ ମସ୍ତକ ସ୍ଥାପନ କରାଯାଇଥାଏ। ତାପରଠାରୁ ମାଁଙ୍କ ଶାରଦୀୟ ପୂଜା ମହୋତ୍ସବ ଆରମ୍ଭ ହେଉଥିବା ପ୍ରକାଶ। ମହାଅଷ୍ଟମୀ ତିଥୀର ମଧ୍ୟ ରାତ୍ରରେ ନବମୀ ତିଥୀ ପ୍ରବେଶ ପୂର୍ବରୁ ସନ୍ଧି ସମୟରେ ମାଣିକେଶ୍ୱରୀ ମନ୍ଦିର ଠାରେ ମହାବଳି ଦିଆଯିବା ପରେ ଉତର ଦ୍ୱାର ନିକଟରେ ଥିବା ଭୈରବ (ବୁଢାରାଜା) ସମ୍ମୁଖରେ ମହାପଶୁ ବଳି ଦେବା ସହ ମାଁଙ୍କ ଉଦେ୍ଦଶ୍ୟରେ ଯୋଡିଏ ପାରା ଛାଡି ଦିଆଯିବାପରେ ମାଁ ମାଣିକେଶ୍ୱରୀଙ୍କ ଚଳନ୍ତି ସ୍ୱରୂପ ଛତରକୁ ସହରର ପଶ୍ଚିମ ଦିଗରେ ଥିବା ଜେନାଖାଲକୁ ନିଆଯାଇଥିଲା। ସେଠାରେ ବିଧି ଅନୁସାରେ ଗୁପ୍ତ ପୂଜା ପାଠ ଓ ବୋଦା ବଳି ଦେବା ପରେ ଲଗ୍ନ ଅନୁସାରେ ପ୍ରାତଃ ୪.୫୫ ମି.ସମୟରେ ମାଁଙ୍କ ସ୍ୱରୂପ ଛତର ଛିଟକପଡା,ମନ୍ଦାର ମାଳ,ବେଲପତ୍ର ଆଦି ଆବୃତ ହୋଇ ଜେନାଖାଲ ଠାରୁ ଛତର ଯାତ୍ରା ଆରମ୍ଭ ହୋଇଥିଲା। ଜାତି ଧର୍ମ ବର୍ଣ୍ଣ ନିର୍ବିଶେଷରେ ଲକ୍ଷାଧିକ ଭକ୍ତଙ୍କ ଗହଣରେ ଘୁମୁରା,ଘଣ୍ଟ,ନିଶାଣ,ଢୋଲ ମାଦଲ ଆଦି ବିଭିନ୍ନ ଅନୁଷ୍ଠାନ ମାନଙ୍କର ବାଦ୍ୟ ମଧ୍ୟରେ ଝୁମି ଝୁମି ମାଁଙ୍କ ସ୍ୱରୂପ ଛତର ଦିନ ୧୦.୨୦ମି. ସମୟରେ ମନ୍ଦିରକୁ ପ୍ରବେଶ କରିଥିଲେ।

ମୂଖ୍ୟ ମନ୍ଦିର ଭିତରକୁ ଛତର ଆସିବା ପରେ ପରମ୍ପରା ଅନୁଯାୟୀ ମହାରାଜା ଉଦିତ ପ୍ରତାପ ଦେଓ,ଯୁବରାଜ ଅନନ୍ତ ପ୍ରତାପ ଦେଓ ଙ୍କ ସମେତ ରାଜ ପରିବାରର ସଦସ୍ୟମାନେ ପୂଜା ଅର୍ଚ୍ଚନା ବନ୍ଦାପନା କରି ଛତରକୁ ଅହ୍ୱାନ କରି ମନ୍ଦିର ଭିତରକୁ ନେଇଥିଲେ। ପ୍ରଶାସନର ବାରଣ ସତ୍ୱେ ଭକ୍ତମାନେ ହଜାର ହଜାର ସଂଖ୍ୟାରେ ବଳି ଦେଇଥିବା ଦେଖାଯାଇଥିଲା। ମାନସିକ ଧାରୀମାନେ ବଳିନଦେଲେ ଅମଙ୍ଗଳ ହେବାର ଆଶଙ୍କା କରୁଥିବା ବେଳେ ମାଁ ମାଣିକେଶ୍ୱରୀ ପ୍ରତ୍ୟକ୍ଷ ଏବଂ ଭକ୍ତଙ୍କ ମନୋକାମନା ପୂରଣ କରିଥାନ୍ତି ବୋଲି ଭକ୍ତମାନଙ୍କ ମଧ୍ୟରେ ଅତୁଟ ବିଶ୍ୱାସ ରହିଛି। ଏପରିକି ମନ୍ଦିରରେ ଛଡାଯାଇଥିବା ପାରା ଯୋଡକି ଉଡି ଉଡି ଆସି ଜେନାଖାଲରେ ପହଂଚି ମାଁଙ୍କ ଛତର ପାଖରେ ବସୁଥିବା ଏବଂ ଛତର ଯାତ୍ରା ସମୟରେ ଛତର ଉପରେ ବସି ମନ୍ଦିର ପର୍ଯ୍ୟନ୍ତ ଯାଉଥିବା ମାଁଙ୍କ ଆଉଏକ ସତ୍ୟତା ବୋଲି ଭକ୍ତମାନଙ୍କ ମଧ୍ୟରେ ବିଶ୍ୱାସ ରହିଛି। ଚଳିତ ବର୍ଷ ପାଖ ପଡୋଶୀ ଜିଲ୍ଲା ସମେତ ପଡୋଶୀ ରାଜ୍ୟ ରୁ ମଧ୍ୟ ହଜାର ହଜାର ସଂଖ୍ୟାରେ ଭକ୍ତମାନଙ୍କ ଅଗମନ ହୋଇଥିବା ଦେଖାଯାଇଥିଲା। ଭକ୍ତମାନଙ୍କ ଭିଡକୁ ଆଖି ଆଗରେ ରଖି ପ୍ରଶାସନ ତରଫରୁ ଶାନ୍ତ ଶୃଙ୍ଖଳା ରକ୍ଷା କରିବାକୁ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଇଥିଲା। ସୂଚନା ଓ ଲୋକସଂପର୍କ ବିଭାଗ ପକ୍ଷରୁ ଧାରା ବିବରଣୀ ପ୍ରଦାନ କରାଯିବାର ବ୍ୟବସ୍ଥା କରାଯାଇଥିଲା।

ସେହିପରି ଭାବେ ଆଦିବାସୀ ଅଧ୍ୟୁଷିତ ଥୁଆମୂଲ ରାମପୁର ଠାରେ ଥିବା ମାଁ ମାଣିକେଶ୍ୱରୀଙ୍କ ପୀଠରେ ମଧ୍ୟ ଛତର ଯାତ୍ରା ପାଳିତ ହୋଇଯାଇଛି। ଥୁଆମୂଲ-ରାମପୁରର ଅଧିଷ୍ଠାତ୍ରୀ ଦେବୀ ମାଁ ମାଣିକେଶ୍ୱରୀ ସ୍ୱୟଂ ଛିନ୍ନମସ୍ତା ହୋଇଥିବାରୁ ଦଶହରା ଅମାବାସ୍ୟା ପରଦିନ ପ୍ରତିପଦା ଦିନ ମାଁଙ୍କ ମସ୍ତକ ସ୍ଥାପନ ଓ ଖଣ୍ଡାବସା କରାଯାଇଥିଲା। ମହାସପ୍ତମୀ ଓ ମହାଅଷ୍ଟମୀର ସନ୍ଧି ସମୟରେ ବିଧମତେ ପୂଜା କରାଯାଇ ବୋଦା ବଳି ଦେବା ପରେ ମାଁଙ୍କ ସ୍ୱରୂପ ଛତରକୁ ଜେନାଖାଲକୁ ନିଆଯାଇଥିଲା। ମହାଅଷ୍ଟମୀ ପ୍ରାତଃ ସମୟରେ ଲଗ୍ନ ଅନୁସାରେ ମାଁ ମାଣିକେଶ୍ୱରୀଙ୍କ ଛତର ବିଜୟ ଯାତ୍ରା ଜେନାଖାଲ ଠାରୁ ବାହାରି ମନ୍ଦିରକୁ ନିଆଯାଇଥିଲା। ମାଂଙ୍କ ଛତର ଦର୍ଶନ ନିମନ୍ତେ ଆଖ ପାଖ ଅଂଚଲର ହଜାର ହଜାର ଭକ୍ତଙ୍କ ସମାଗମ ହୋଇ ମାନସିକ ଧାରୀ ମାନଙ୍କ ଦ୍ୱାରା ବଳି ଦିଆଯାଇଥିଲା। ମାଁଙ୍କ ଛତର ମନ୍ଦିର ସିଂହଦ୍ୱାର ନିକଟରେ ପହଂଚିବା ପରେ ପୂଜାର୍ଚ୍ଚନା କରାଯାଇ ମୂଖ୍ୟ ପୂଜକ ମନ୍ଦିର ଭିତରକୁ ନେଇଥିଲେ। ଭକ୍ତମାନଙ୍କ ସମାଗମକୁ ଆଖି ଆଗରେ ରଖି ପ୍ରଶାସନ ପକ୍ଷରୁ ଶାନ୍ତି ଶୃଙ୍ଖଳା ରକ୍ଷା ପାଇଁ ଆବଶ୍ୟକୀୟ ପଦକ୍ଷେପ ନିଆଯାଇଥିଲା। ଶାରଦୀୟ ପୂଜା ଅବସରରେ ମାଁଙ୍କ ଭକ୍ତି ଆରାଧନା କରିବା କଳାହାଣ୍ଡିବାସୀଙ୍କ ଏକ ସୁସ୍ଥ ପରମ୍ପରା ରହି ଆସିଛି।

Leave a Reply

Your email address will not be published. Required fields are marked *