ଓଡ଼ିଶା

ଓଡ଼ିଶାର ଚଣ୍ଡିଖୋଲ ଓ କର୍ଣ୍ଣାଟକର ପାଦୁରଠାରେ ଅତିରିକ୍ତ ୬.୫ ନିୟୁତ ଟନ ଭୂତଳ ତୈଳ ଭଣ୍ଡାର ପ୍ରତିଷ୍ଠା ପ୍ରସ୍ତାବକୁ କ୍ୟାବିନେଟର ଅନୁମୋଦନ

ନୂଆ ଦିଲ୍ଲୀ ୨୭-୬ (ଓଡ଼ିଆ ପୁଅ) ଓଡ଼ିଶାର ଚଣ୍ଡିଖୋଲ ଏବଂ କର୍ଣ୍ଣାଟକର ପାଦୁରଠାରେ ଅତିରିକ୍ତ ୬.୫ ନିୟୁତ ମେଟ୍ରିକ ଟନ(ଏମଏମଟି) କ୍ଷମତାବିଶିଷ୍ଟ ରଣନୈତିକ ଭୂତଳ ତୈଳ ଭଣ୍ଡାର (ଏସପିଆର) ପ୍ରତିଷ୍ଠା କରାଯିବ। ଏହାଛଡ଼ା ଏହି ଦୁଇଟି ଏସପିଆର ପାଇଁ ସମର୍ପିତ ଏସପିଏମ (ସିଙ୍ଗଲ ପଏଂଟ ମୁରିଂ) ନିର୍ମାଣ କରାଯିବ। ଏ ସଂକ୍ରାନ୍ତ ପ୍ରସ୍ତାବକୁ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ଅନୁମୋଦନ କରିଛନ୍ତି। ଚଣ୍ଡିଖୋଲ ଏବଂ ପାଦୁରଠାରେ ନିର୍ମାଣ ହେବାକୁ ଥିବା ଏହି ତୈଳ ଭଣ୍ଡାର ଭୂତଳ ସୁଡ଼ଙ୍ଗ ମଧ୍ୟରେ ରହିବ ଏବଂ ଏଗୁଡ଼ିକର କ୍ଷମତା ଯଥାକ୍ରମେ ୪ ଏମଏମଟି ଏବଂ ୨.୫ ଏମଏମଟି ହେବ। ସୂଚନାଯୋଗ୍ୟ ଯେ ୨୦୧୭-୧୮ ବଜେଟରେ ଦୁଇଟି ଅତିରିକ୍ତ ତୈଳ ଭଣ୍ଡାର ପ୍ରତିଷ୍ଠା ଲାଗି କେନ୍ଦ୍ର ସରକାର ଘୋଷଣା କରିଥିଲେ।

ଭାରତ ସରକାରଙ୍କ ବଜେଟ ସହଯୋଗ ପରିମାଣ ହ୍ରାସ କରିବା ଲାଗି ଏହି ପ୍ରକଳ୍ପକୁ ପିପିପି ବା ସରକାରୀ-ଘରୋଇ ଭାଗିଦାରୀ ମଡେଲ ଆଧାରରେ ନିର୍ମାଣ କରାଯିବା ଲାଗି ନୀତିଗତ ମଞ୍ଜୁରି ପ୍ରଦାନ କରାଯାଇଛି। ସମ୍ଭାବିତ ନିବେଶକଙ୍କ ସମେତ ବଜାର ଆବଶ୍ୟକତାକୁ ପୂରଣ କରିବା ଲାଗି ରୋଡ-ଶୋ/ପ୍ରଦର୍ଶନୀ ଆୟୋଜନ କରାଯିବା ପରେ ଅର୍ଥମନ୍ତ୍ରଣାଳୟର ପରାମର୍ଶକ୍ରମେ ପେଟ୍ରୋଲିୟମ ଏବଂ ପ୍ରାକୃତିକ ବାଷ୍ପ ମନ୍ତ୍ରଣାଳୟ ଏହି ପ୍ରକଳ୍ପ ପାଇଁ ଭାଗିଦାରୀର ସର୍ତ ଏବଂ ନିୟମାବଳୀ ନିର୍ଦ୍ଧାରଣ କରିବ।

ପୂର୍ବରୁ ଆଇଏସପିଆରଏଲ ପକ୍ଷରୁ ଅଶୋଧିତ ତୈଳ ସଂରକ୍ଷଣ କରି ରଖିବା ପାଇଁ ତିନୋଟି ସ୍ଥାନରେ ୫.୩୩ ମେଟ୍ରିକ ଟନ କ୍ଷମତା ବିଶିଷ୍ଟ ଭୂତଳ ସୁଡ଼ଙ୍ଗ ନିର୍ମାଣ କରାଯାଇସାରିଛି। ଏଗୁଡ଼ିକ ହେଲା- ବିଶାଖାପାଟଣା (୧.୩୩ ଏମଏମଟି), ମାଙ୍ଗାଲୋର (୧.୫ ଏମଏମଟି) ଏବଂ ପାଦୁର (୨.୫ ଏମଏମଟି)। ୨୦୧୬-୧୭ ଆର୍ଥିକ ବର୍ଷର ପେଟ୍ରୋଲିୟମ ବ୍ୟବହାର ତଥ୍ୟ ଅନୁଯାୟୀ ପ୍ରଥମ ପର୍ଯ୍ୟାୟରେ ତୈଳ ଭଣ୍ଡାର କାର୍ଯ୍ୟକ୍ରମରେ ନିର୍ମାଣ କରାଯାଇଥିବା ୫.୩୩ ଏମଏମଟି କ୍ଷମତା ବିଶିଷ୍ଟ ଅଶୋଧିତ ତୈଳ ଭଣ୍ଡାର ୧୦ ଦିନ ପର୍ଯ୍ୟନ୍ତ ଭାରତର ଇନ୍ଧନ ଆବଶ୍ୟକତା ପୂରଣ କରାଯିବ। ଅତିରିକ୍ତ ୬.୫ ଏମଏମଟି କ୍ଷମତାବିଶିଷ୍ଟ ରଣନୈତିକ ପେଟ୍ରେଲିୟମ ଭଣ୍ଡାର ସୁବିଧା ନିର୍ମାଣ କରିବା ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିବା ପରେ ଏହାର ଅତିରିକ୍ତ ୧୨ ଦିନ ପର୍ଯ୍ୟନ୍ତ ଅଶୋଧିତ ତୈଳ ଆବଶ୍ୟକତାକୁ ପୂରଣ କରିପାରିବ ଏବଂ ଏହା ଭାରତର ଶକ୍ତି ନିରାପତାକୁ ସୁନିଶ୍ଚିତ କରିବ ବୋଲି ଆଶା କରାଯାଉଛି।

ଚଣ୍ଡିଖୋଲ ଏବଂ ପାଦୁରରେ ତୈଳ ଭଣ୍ଡାର ନିର୍ମାଣ ସମୟରେ ଓଡ଼ିଶା ଏବଂ କର୍ଣ୍ଣାଟକରେ ଗୁରୁତ୍ୱପୂର୍ଣ୍ଣ ପ୍ରତ୍ୟକ୍ଷ ଏବଂ ପରୋକ୍ଷ ନିଯୁକ୍ତି ପାଇଁ ସୁଯୋଗ ସୃଷ୍ଟି ହେବ।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

Odia Pua is the first Odia News paper which is printed & Published from New Delhi & first Odia mobile news site.

© 2018 | Odiapua.com, All Rights Reserved. | Powered By Suryanandan.net

To Top