ଓଡ଼ିଶା

ଆଖଣ୍ଡଳମଣିଙ୍କ ପ୍ରସିଦ୍ଧ ଶିବବିବାହ ଉତ୍ସବ ପାଇଁ ଶୁଭଲଗ୍ନ ଅନୁଷ୍ଠିତ ବିବାହ ବେଦୀରେ ବାବାମଣି ଯୌତୁକ ବାବଦକୁ ନେବେ ୧୦୦୧ଟଙ୍କା, ୨ହଳ ବୃଷଭ, ୫ହଳ ନାଗନାଗୁଣୀ, ୨ଏକର ଶ୍ମଶାନ ଜମି

ଭଦ୍ରକ, ୧୧ା୫ (ଓଡ଼ିଆ ପୁଅ / ପ୍ରମୋଦ ରାୟ) : ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡିଧାମର ବାବା ଆଖଣ୍ଡଳମଣିଙ୍କ ପ୍ରସିଦ୍ଧ ଶିବବିବାହ ଉତ୍ସବ ଆସନ୍ତା ଜୁନ୍ ୧୭ରେ ପାଳିତ ହେବ। ଏଥି ପାଇଁ ଆଜି ବୈଦିକ ରୀତିନୀତି ଓ ଲୋକାଚାରରେ ଲଗ୍ନ ଚିଟାଉ କାର୍ଯ୍ୟ ସମ୍ପନ୍ନ ହୋଇଛି। ଏହି ଲଗ୍ନଧରା କାର୍ଯ୍ୟ ଠାରୁ ଆରମ୍ଭ ହୋଇଛି ମଣିବାବାଙ୍କ ବିବାହ ଉତ୍ସବର ନୀତିକାନ୍ତି। ବ୍ରାହ୍ମଣ, ସେବାୟତ ଓ ଜ୍ୟୋତିଷଙ୍କ ଦ୍ୱାରା ସ୍ଥିରିକୃତ ହୋଇଛି ଆଷାଢମାସ ଶୁକ୍ଳପକ୍ଷ ପଞ୍ଚମୀ ତିଥିରେ ହସ୍ତଗଣ୍ଠି ପଡିବ ଦେବଦମ୍ପତ୍ତିଙ୍କର। ଏହି ବିବାହ ଉତ୍ସବରେ ବରପିତା ଭାବେ ସେବାୟତ ଚନ୍ଦ୍ରମଣି ପାଢୀଙ୍କ ଦାତା ଚନ୍ଦ୍ରଶେଖର ଦାଶଙ୍କୁ ସୈାଭଗ୍ୟ ପ୍ରାପ୍ତି ହୋଇଥିବା ବେଳେ କନ୍ୟାପିତା ଭାବେ ସେବାୟତ ନାରାୟଣ ପଣ୍ଡା ସୈାଭାଗ୍ୟ ଲାଭ। ଏହି ବିବାହ ଉତ୍ସବ ସମ୍ପୁର୍ଣ୍ଣ ଲୋକାଚାର ଅନୁଷ୍ଠିତ ହେବା ସହ ବିବାହ ବେଦୀରେ ଦେବଦେବ ମହାଦେବ ‘ଆଖଣ୍ଡଳମଣି’ ଯୌତୁକ ବାବଦକୁ ନେବେ ୧୦୦୧ଟଙ୍କା ସହ ୨ହଳ ବୃଷଭ, ୫ହଳ ନାଗନାଗୁଣୀ ଓ ୨ଏକର ଶଶ୍ମାନ ଜମି। ଯାହା କନ୍ୟାପିତା ବରପିତାଙ୍କୁ ପ୍ରଦାନ କରିବେ ବୋଲି ଏହି ଲଗ୍ନ କାର୍ଯ୍ୟରେ ଉପସ୍ଥିତ ଥିବା ଜ୍ଞାତିକୁଟୁମ୍ବ ଓ ପରିଜନଙ୍କ ଗହଣରେ ପ୍ରକାଶ ପାଇଛି। ଏହି ମାଙ୍ଗଳିକ କାର୍ଯ୍ୟ ନିମନ୍ତେ ଆଜି ମନ୍ଦିରର ରୀତିନୀତି ଅନୁଯାୟୀ ଭୋର ମନ୍ଦିର ପହଡ ଖୋଲିବା ପରେ ଦୈନଦିନ ନୀତିନିର୍ଘଣ୍ଟ ଅନୁସାରେ ମଙ୍ଗଳ ଆଳତୀ କରାଯିବା ସହିତ ମଣିବାବାଙ୍କୁ ମହୁ, ଘୃତ, ପଞ୍ଚାମୃତରେ ମହାସ୍ନାନ କରାଯିବା ସହ ଜଳାଭିଷେକ ଓ ରୁଦ୍ରାଭିଷେକ କରାଯାଇଥିଲା।ପରେ ମଣିବାବାଙ୍କୁ ଚନ୍ଦନ ଫୁଲରେ ଦିଗମ୍ବର ବେଶରେ ସଜିତ କରାଯାଇ ପହିଲୁ ବାଲ୍ୟ ଭୋଗ ଲାଗି କରାଯାଇଥିଲା। ଅପରାହ୍ନ ୍ନ ୩ଟା ସୁଧା ମଣିବାବାଙ୍କର ସମସ୍ତ ସକାଳ ଧୂପ ସରିବା ପରେ ବିଧିବିଧାନ ଅନୁଯାୟୀ ମଣିବାବାଙ୍କ ଠାରୁ ଆଜ୍ଞା ମାଳ ଆସିବା ପରେ ବରପିତା ଭାବେ ଚୟନ ହୋଇଥିବା ଚନ୍ଦ୍ରଶେଖର ଦାଶ ମନ୍ଦିର ନିକଟରୁ ଲଗ୍ନ କାର୍ଯ୍ୟ ନିମନ୍ତେ ଏକ ବିରାଟ ପଟୁଆର ସହ ମା ପାର୍ବତୀଙ୍କୁ ବଧୁବେଶରେ ସଜେଇ ଦେବା ପାଇଁ ଶଙ୍ଖା, ସିନ୍ଦୁର, ଶାଢି ସହ ବିଭିନ୍ନ ମିଷ୍ଟାନ ଓ ଫଳ ଆଦି ଶୋଭାଯାତ୍ରା ବାହାରିଥିଲେ କନ୍ୟା ପିତାଙ୍କ ଘର ଅଭିମୁଖେ। ଏହି ଶୋଭାଯାତ୍ରାରେ ସକିଂର୍ତ୍ତନ ମଣ୍ଡଳୀଙ୍କ ସମେତ ମନ୍ଦିରର ସେବାକାରୀ ମାଳି, ବାରିକମାନଙ୍କ ପକ୍ଷରୁ ଆଲଟ, ଚାମର, ଛତ୍ର, ଛତି ଆଦି ପାରମ୍ପରିକ ବାଦ୍ୟରେ ଲାଗ୍ନକାର୍ଯ୍ୟ ନିମନ୍ତେ ସମସ୍ତ ସାମଗ୍ରୀକୁ ମନ୍ଦିରର ବେଢା ପରିକ୍ରମା କରାଯିବା ସହ ନଗରୀ ପରିକ୍ରମା କରାଯାଇ କନ୍ୟାପିତା ଭାବେ ଚୟନ ହୋଇଥିବା ନାରାୟଣ ପଣ୍ଡାଙ୍କ ଘରେ ପହଁଚିବା ପରେ ଶଙ୍କ ଘଣ୍ଟ ଚାମର ଦ୍ୱାରା ସ୍ୱାଗତ କରାଯାଇ ଗୃହ ମଧ୍ୟକୁ ପ୍ରବେଶ କରାଯାଇଥିଲା। ସେଠାରେ ବ୍ରାହ୍ମଣ, ଜୈାତିଷ୍ୟ, ଭଣ୍ଡାରୀ ମାଳି ସେବକଙ୍କ ଦ୍ୱାରା ପୂଜାଅର୍ଚ୍ଚନା କରାଯାଇ ଜ୍ୟୋତିଷ୍ୟଙ୍କ ଦ୍ୱାରା ଲଗ୍ନ ଚିଟାଉ ତାଳପତ୍ର ଓ ଲିଖନି ଦ୍ୱାରା ଲେଖା ହେବା ପରେ ବସିଥିବା ବରିଷ୍ଠ ସେବାୟତ ଓ ପ୍ରଶାସନିକ ଅଧିକାରୀଙ୍କ ଗହଣରେ ପାଠ କରାଯାଇଥିଲା। ପରେ ଉକ୍ତ ଲଗ୍ନ ଚିଟାଉକୁ କନ୍ୟାପିତା ଚନ୍ଦ୍ରମଣି ପାଢୀଙ୍କ ଦାତା ଚନ୍ଦ୍ରଶେଖର ଦାଶ ବର ପିତା ପ୍ରେମାନନ୍ଦ ପାଢୀଙ୍କ ହସ୍ତକୁ ପ୍ରଦାନ କରିଥିଲେ। ଏହି ଲଗ୍ନ ଚିଟାଉ ବରପିତା ପାଇବା ପରେ ପୁର୍ନବାର ଘଣ୍ଟ, କିର୍ତ୍ତନ ଓ ଆଲଟ, ଚାମର, ଛତ୍ର ଦ୍ୱାରା ନଗରୀ ପରିକ୍ରମା କରାଯାଇ ବରପିତାଙ୍କ ବାସଗୃହରେ ପଠନ କରାଯାଇଥିଲା। ଏଥିସହ ରାଜ୍ୟର ପ୍ରମୁଖ ଜିଲା ଗୁଡିକରୁ ଆସୁଥିବା ବାଦ୍ୟକାରମାନଙ୍କୁ ବଇନା ଦିଆଯିବା ପାଇଁ ମଧ୍ୟ ସ୍ଥିରିକୃତ ହୋଇଥିଲା। ଏପରିକି ଶୁଭଲଗ୍ନ(ବିବାହ)ଦିନ ଶ୍ରୀକ୍ଷେତ୍ର ପୁରୀର ସାହିମେଢ, ଶଣ୍ଢନାଚ, ବାଘନାଚ, ବନାଟି, ବାଲେଶ୍ୱରର ପାଇକ ଆଖଡା, ଅଶୁରନାଚ, ପଶ୍ଚିମ ଓଡିଶାର ମାଦଲ ବାଜା, ଦୁଲୁଦୁଲି, ଷଣ୍ଢ ଲଢେଇ, ଲଉଡି ବାଦ୍ୟ, ମୟୁରଭଞ ଧୁମସା ବାଦ୍ୟ, ବ୍ରହ୍ମପୁରର ଯୋଡିଶଙ୍ଖ ଆଦି ବାଦ୍ୟ ଗୁଡିକୁ ବଇନା ଦିଆଯିବା ପାଇଁ ମନ୍ଦିର ପ୍ରଶାସନ ଓ ସେବାୟତମାନଙ୍କ ପକ୍ଷରୁ ସ୍ଥିର ହୋଇଥିଲା। ଏହି ଶୋଭାଯାତ୍ରାରେ ମନ୍ଦିରର ସମସ୍ତ ସେବାକାରୀଙ୍କ ସହ ଶ୍ରଦ୍ଧାଳୁଭକ୍ତ ଯୋଗ ଦେଇଥିଲେ।

Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

Odia Pua is the first Odia News paper which is printed & Published from New Delhi & first Odia mobile news site.

© 2018 | Odiapua.com, All Rights Reserved. | Powered By Suryanandan.net

To Top