ଅବସରପ୍ରାପ୍ତ ଶିକ୍ଷକ ଓ କର୍ମଚାରୀସଂଘର ବାର୍ଷିକ ଉତ୍ସବ

ପୁରୀ,୫/୯ (ଓଡ଼ିଆ ପୁଅ/ବିଜୟ ପଟ୍ଟନାୟକ): ପୁରୀଜିଲ୍ଲା ଅବସରପ୍ରାପ୍ତ ଶିକ୍ଷକଓ କର୍ମଚାରୀ ସଂଘର ବାର୍ଷିକ ଉତ୍ସବ ଓ ଗୁରୁଦିବସ ମହାସମାରୋହରେ ଆଜି ଅନୁଷ୍ଠିତ ହୋଇଯାଇଛି। ୟୁଥ୍ ହଷ୍ଟେଲ ପରିସରରେ ଆୟୋଜିତ ଏହି ଉତ୍ସବରେ ସଭାପତି ଲକ୍ଷ୍ମୀଧର ତ୍ରିପାଠୀ ଅଧ୍ୟକ୍ଷତା କରିଛନ୍ତି। ସଙ୍ଗଠନର ସାଧାରଣ ସମ୍ପାଦକ ବିଶ୍ୱନାଥ ବେହେରା, ପ୍ରାରମ୍ଭରେ ସମ୍ପାଦକୀୟ ବିବରଣୀ ପାଠ କରିଥିଲେ। ଅବସରପ୍ରାପ୍ତ ଶିକ୍ଷକମାନଙ୍କର ବିଭିନ୍ନ ସମସ୍ୟା ଉପରେ ଆଲୋକପାତ କରାଯାଇଥିଲା। ଲବ୍ଧ ପ୍ରତିଷ୍ଠିତ ସାହିତ୍ୟିକ ରଜତ କୁମାର କର ଉତ୍ସବରେ ମୁଖ୍ୟ ଅତିଥି ଓ ସାମ୍ବାଦିକ ପ୍ରଦୁ୍ୟମ୍ନ ଶତପଥୀ ମୁଖ୍ୟ ବକ୍ତା ଭାବେ ଯୋଗ ଦେଇଥିବା ବେଳେ ଅବସରପ୍ରାପ୍ତ ଅଧ୍ୟକ୍ଷ କାର୍ତ୍ତିକ କୁମାର ଦାସ, ଡକ୍ଟର ସୁବାଷ ଚନ୍ଦ୍ର ଜେନା, ପ୍ରଫେସର ଅଦ୍ୟେତ କୁମାର ଧଳ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଅବସରପ୍ରାପ୍ତ ଶିକ୍ଷକ, ଅଧ୍ୟାପକମାନଙ୍କର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିବା ସହ ସରକାର ଏଦିଗରେ ପଦକ୍ଷେପ ଗ୍ରହଣ କରିବାକୁ ଆହ୍ୱାନ କରିଥିଲେ। ବକୁଳବନ ପଞ୍ଚସଖା ପୀଠ ପ୍ରତି ହୋଇଥିବା ଅନ୍ୟାୟ, ଅବିଚାର ଓ ଅସମ୍ମାନର ପ୍ରଦର୍ଶନ ଏବଂ ଉକ୍ତ ପବିତ୍ର ସ୍ଥଳୀକୁ ଏ ଜାତିର ତୀର୍ଥଭୂମିର ମର୍ଯ୍ୟାଦା ଓ ଜାତୀୟ ସ୍ମାରକୀ ଘୋଷଣା କରିବାରେ ରାଜ୍ୟ ସରକାରଙ୍କର ଟାଳଟୁଳ ନୀତି ପ୍ରତିବାଦରେ  ସମାରୋହକୁ ଉତ୍ସର୍ଗ କରାଯାଇଥିଲା। ଏହି ଅବସରରେ ଶିକ୍ଷକ ରାମଚନ୍ଦ୍ର ପ୍ରଧାନ, ମଞ୍ଜୁବାଳା ରଥ, ଚନ୍ଦ୍ରଶେଖର ମିଶ୍ର, ବିପିନ୍ ବିହାରୀ ସେନ୍, ଭାବଗ୍ରାହୀ ରାଉତରାୟ, ସତ୍ୟବାନ ରଥ, ସୁବାଷ ଚନ୍ଦ୍ର ଜେନା, କୃତିବାସ ନନ୍ଦଙ୍କୁ ସମ୍ବର୍ଦ୍ଧିତ କରାଯାଇଥିବା ବେଳେ ଲକ୍ଷ୍ମୀଧର ଦାଶଙ୍କୁ ଲକ୍ଷ୍ମୀଧର ବର ସ୍ମୃତି ସମ୍ମାନ ଏବଂ କୈଳାସ ରାୟ ଓ ଜଗନ୍ନାଥ ବସ୍ତିଆଙ୍କୁ ସମ୍ବର୍ଦ୍ଧିତ କରାଯାଇଥିଲା। କାର୍ଯ୍ୟକ୍ରମକୁ ରମେଶ ବଳିଆର ସିଂ, ଗୁରୁପ୍ରସାଦ ମିଶ୍ର, ମହେଶ୍ୱର ମହାପାତ୍ର, ବିଜୟ କୁମାର ପଣ୍ଡା, ବିଜୟ କୁମାର ମହାନ୍ତି ଓ ପ୍ରଫୁଲ୍ଲ କୁମାର ମହାନ୍ତି ପ୍ରମୁଖ ଉତ୍ସବ ପରିଚାଳନା କରିଥିଲେ।

Leave a Reply

Your email address will not be published. Required fields are marked *